Shillong, Naitung, 31: Ka Jaïaw Ehrngiew Transport Society ba la tip paidbah ruh kum ka (JETS 24X7) kaba dei ka Bike Taxi Aggregator kaba nyngkong eh ha ka jylla Meghalaya ban ïoh jingithuh na ka Sorkar Jylla ha ka sngi Palei ka la pynsngew ha u Chief Secretary ka jylla u Bah DP Wahlang ba ka Sorkar ka dei ban leh tyngeh da kaba khang noh ïa ka Bike Taxi Aggregator beaiñ kaba treikam ha ka kyrteng jong ka ‘Rapido’ ban kamai khlem laisen ha kane ka jylla Meghalaya da kaba pynkheiñ ïa ka Rule 3 sub section (1) jong ka Meghalaya Taxi Aggregator Operational Rules 2020.
Ka jingkamai beaiñ khlem laisen da ka Rapido nabar ka jylla ka la long kum kum ka jingknieh noh ïa ka pliangja jong ki samla trai jylla kiba im kamai jakpoh na ka kam niah thuk thuk ar shaka bad khamtam eh ïa ka JETS 24X7 kaba long ka Bike Taxi Aggregator kaba la ïoh da ka laisen na ka Sorkar.
Ha ka jingïakren bad ki lad pathai khubor hadien ka jingïakynduh ïa u Chief Secretary, u Managing Director jong ka JETS 24X7 u Bah Pynskhemlang Uriah u la ïathuh ba u Chief Secretary u la kular ba un sa khot da ka jingïalang ha kine ki khyndiat sngi ïa u Commisisoner and Secretary ka tnat Transports bad ïa ka Deputy Commissoner ban ïakren sani halor kane ka jingdawa.
U la ïathuh ruh ba ka jingïakynduh ïa u Chief Secretary ha kane ka sngi ka long beit ban pynkynmaw ïa ka Sorkar ba kan khang noh ïa ka App jong ka Rapido lyngba ka “Geo-fencing” namar kumba ka long mynta ka jingkamai beaiñ jong ka Rapido ka ktah pat ïa ka JETS 24X7 kaba la ïoh laisen na ka Sorkar Jylla.
