Shillong, Naitung, 02: Ki dkhot jong ka Synjuk ki Nongñiah Taxi Sor bad Khapsor ba la lamkhmat da u Bah Pynsuk Youroi bad kynthup ruh na ka Jets 24×7 ba lamkhmat da u samla Pynskhem Uriah ki la leit ban khang tala ïa ka ophis treikam jong ka Rapido ha Malki, Shillong ha ka sngi Baar.
Ka jingleit khang tala ïa ka ophis treikam jong ka Rapido ka long halor ka jingkynnoh ba ka kompeni Rapido ka shu treikam be-aiñ hapoh kane ka jylla khlem ka License kaba biang da kaba knieh noh ïa ka pliangja jong ki trai jylla kiba la ïoh License kum ki Aggregator ban kamai da kaba kit ïa ki nongleit jingleit ha Shillong bad kiwei kiwei ki jaka jong ka jylla.
“Kum ki Aggregator kiba la ïoh laisen ka pynsngewsih ïa ngi ba ngi hap ban ïakhun bad kiwei pat ki bym don laisen. Ïa ka laisen ngi la ïoh naduh u bnai Ïaiong, 2023. Naduh ba ngi ïoh laisen, ki (Rapido) dang kamai be-aiñ ha ka jylla jong ngi. Ha ka jingshisha ïa ka jingujor ngi la phah shaduh u Myntri ka tnat Transports ha u Risaw, 2023 hynrei haduh mynta ka Sorkar kam shym la leh eiei la jan dap shi snem,” ong u samla Uriah.
“Kum ki local start-up ngi shem jynjar bha ban ïakhun bad ki Aggregator be-aiñ. Ka Rapido haba ka khot ïa ki nongñiah thuk thuk ban kamai kam ju pan ïa ka Permit bad ïa ka Police Verification,” u la ong.
Shuh shuh u la ong ba ka jingkhang tala ïa ka Rapido ka long ban pynthikna ïa ka jingshngaiñ jong ki nongleit nongwan kiba leit jingleit da ki thuk thuk kamai ar shaka.
“Ngi kyrpad ïa ki nongñiah thuk thuk ban kamai, kumba ma ngi baroh ngi don ïa ka hok ban kamai jakpoh tangba ngi dei ban ïaid da ka lynti kaba dei,” la kyrpad u samla Uriah uba dei ruh u Managing Director jong ka JETS 24×7.
U la ong ba lada ki don ki kompeni kiba shu kamai beaiñ kan ktah bha haduh katta katta ïa ki Aggregator kiba ka Sorkar hi ka la ai ïa ka laisen.
Hadien, kane Synjuk ki Nongniah Kali Sor bad Khapsor ki la leit ban ïa kynduh ïa u Executive Member jong ka KHADC uba peit ïa ka tnat Labour u Bah Victor Rani.
U General Secretary jong ka Synjuk u Bah Pynsuk Youroi u la ïathuh ba ka Synjuk kaba don ïa ka jingsngewkhia halor ka jingjyllei jong ki bar jylla kiba niah ïa ki taksi kamai, ka seng ka la dawa ïa ka District Council ban pynsahngeh noh ka jingai Labour License sha ki bar jylla bad u la ïathuh ruh ba ka Synjuk ka ladep pynsngew ïa kane ka mat jingdawa sha ka Council la ar snem mynshwa mynba u Bah Titortarwell Chyne u dang long u Chief Executive Member jong ka Council ha kaba u la kubur ba ladep ban pynsangeh ïa ka jingai Labour License, katba na ka liang jong ka Synjuk ka lap ba katba nang mih ki sngi ka jingjyllei jong ki bar jylla kiba niah ïa ki taksi kamai ka la nang kiew.
