Shillong, K’lyngkot, 16: Ka Synjuk ki Khlieh Nongsynshar Shnong, Mawsynram Block ha ka sngi Thohdieng ryngkat ka jingsynran lang ki nongïalam jong ki sengbhalang bad ki paidbah ka shnong Mawsynram ki la khang tala ïa ka ophis treikam jong ka SAI Computers Limited.
U Chairman jong ka Synjuk Bah Hiamdor Rapsang ha ka jingïakren bad ki lad pathai khubor hadien ba la khang tala ïa ka ophis treikam jong ka SAI Computers Limited u la ong ba kane ka kompeni kaba wan nabar ka jylla ka la treikam khlem da ïoh ïa ka No Objection Certificate (NoC) na ka Dorbar Shnong bad khlem ka Trading License na ka Khasi Hills Autonomous District Council (KHADC).
U la ong ruh ba ka jingïai bteng jong ka Sorkar ban aiti sha ka kompeni na ka bynta ban sam ïa ka bording nalor ba ka la don lypa ka Meghalaya Power Distribution Limited (MePDCL) ka la pynbitar haduh katta katta ïa ki paidbah ka Mawsynram C&RD Block wat hadien ba ka tnat Bording ka la pynkut noh ïa ka jingshakri kaba hynriew snem jong ka FEDCO.
“Ngi dang khmihlynti hadien ba ka Sorkar ka la pynkut noh ïa ka kontrak kaba tang 6 snem bad ka FEDCO kan aiti noh ïa ka jingsam bording sha ka Meghalaya Power Distribution Limited (MePDCL) hynrei ha ka 1 tarik, Naiwieng, 2025 ka la pynmih pynban da ka jingpynbna ban aiti ïa ka jingsam bording sa sha ka SAI Computers Limited,” u la ong bad bynrap lada ka kompeni kaba ïohkam ban sam ïa ka bording sha ki paidbah ka lah ban thungkam da ki samla trai jylla balei pat ka Sorkara kam lah ban thungkam da kine ki samla kiba la don lypa ka kyrdan jingnang jingstad ban pynrung kam hapoh ka Meghalaya Power Distribution Limited.
