Shillong, Lber, 31: Ka All Lyngngam Organizaton kaba dei kawei na ki kynhun treimon sngewbha ïa kaba la seng da ki katto katne ki samla naka thaiñ Ri Lyngngam kiba kynthup ïa u Benjamine Mawsor ba la bam kwai ha Dwar u Blei, u Lidrikshon Shyrkon, u Coneleos Nongbri, u Kenedy Hashah u Kwirinus Mawsor bad kiwei kiwei naduh u snem 1986 da ka jingthmu ban pynïatylli ha ka jinglong shipara hapoh ka Ri Lyngngam, ban kyntiew ïa ka pule puthi ban pynneh pynsah ïa ki riti ki dustur u Lyngngam, kumjuh ruh ban pynneh pynsah ïa ka rukom bat kyndew ki Lyngngam bad kiwei kiwei.
Hynrei kane ka kynhun ka la shu jah noh bad sangeh treikam jin haduh 13 snem eiei bad dei ha ka 29 tarik, Lber 2025 la pynkhie im biang ïa kane ka kynhun ha kaba la jied bad pynthymmai ruh ïa ki nongkitkam jong ka kynhun na ka bynta ka samoi trekam jong u snem 2025-2028.
Ïa ki nongkitkam la pynskhem da u Bah Kwirinus Mawsor uba long uwei na ki nongseng banyngkong eh ïa kane ka kynhun ha ka jingïalang kaba la long ha Vani Hall Pyndengrei, Nongstoiñ ha kaba la ïadonlang ruh ki kynrem ki lyndan jong ka thaiñ Ri Lyngngam kiba kynthup naduh u Bah Pius Marweiñ uba long u MLA jong ka Ranikor, u bah Methodios Dkhar uba long u MLA jong ka Mawshynrut kiba la long ruh kum ki kongsan, u MDC Bah Srally Rashir, ki MDC barim ba kynthup ïa u Bah Nondi Diengngan bad u Bah Goerge Rynñiaw, ki ophisar ki doctor, ki Phadar ki Pastor bad kiwei kiwei.
