Shillong, Jylliew, 26: San ngut ki briew ki la shah kem ha ka sngi Balang halor ka jingdonkti ban khyrwit da ki dieng ia kawei ka kynthei ha kawei ka shnong ha West Garo Hills District.
Kane ka la jia ha ka shnong Teksragre kaba hap hapoh ka Dadenggre Civil Sub-division ha ka por shiteng sngi ka sngi Baar, la iathuh u Superintendent of Police ka West Garo Hills u Abraham T. Sangma.
Ki Pulit ki la shimkhia marmar tang shu iohi ia ka lyngkhot video ba la saphriang ha ka social media, ba la ring dur ia ki lai ngut ki rangbah kiba la sympat khlem jingisynei ia kawei ka kynthei da ki siej watla ka la lynñiar bad panmap.
“Ha kaba sdang, ngi la kem shwa arngut bad mynta ka janmiet, ngi la kem sa lai ngut kiwei pat. Kine ki san ngut ki dei kiba donkti ban kawut khlem jingisynei ia ka kynthei,” ong u Abraham haba pyntip ba ia kine kiba donkti yn sa tian bishar ha Kashari lashai ka sngi Palei.
U la pyntip ba yn sa kem shuh shuh ia kiba donkti ynda la tohkit na ka kynthei, kaba mynta ka dang don hapdeng ka jingshah sumar.
Haba kylli, u SP u la iathuh ba la phah ruh da ka jingpyntip sha u Nokma jong ka shnong halor kane ka jingjia. U la ong ba kane ka jingjia ka dei kaba don jingiadei bad ka kam iing kam sem. “Hynrei, watla katta ngin dang hap ban tih bniah halor kane,” u la ong.
Ha kaba iadei bad kane, ka Meghalaya State Commission for Women (MSCW) ka la pynpaw ia ka jingsngewsih bad ka jingsngew kyndit ia ka jingtangon khlem jingisynei ia ka kynthei ha ka shnong Teksragre, West Garo Hills bad pynrem jur ruh ia kane ka jingjia.
Ka Commission ka la shim Suo Moto ruh halor kane ka jingjia bad ha ka por shiteng sngi jong ka Sngi Balang ka Vice Chairperson jong ka Meghalaya State Commission for Women bad ki dkhot ki la leit ban iakynduh ia u Superintendent of Police jong ka West Garo Hills ban tohkit bniah halor kane ka jingjia ha kaba u la pyntip sha ka Commission ba ki Pulit ki la kem ia kiba donkti.
Ia ka shithi halor kane ka jingjia la phah lyngba ka email sha ka ophis jong u Superintendent of Police jong ka West Garo Hills, la pyntip ka Commission ha u kyrwoh ba la phah sha ki lad pathai khubor.
Ka Commission ka la pyntip ba kan sa leit ban iakynduh ia ka lanot bad ban buddien ruh ia kane ka jingjia na ka bynta ban leh ia kaba donkam katkum ki kyndon jong ka aiñ.
