Mairang, K’lyngkot, 13: Ha kawei na ki jingjia kaba sngewsih arngut ki longkmie ki la khlad noh na kane ka sla pyrthei hadien ba kawei ka kali Sumo kaba ki shong ka la tynrah ia ka trok kaba ïeng harud ka surokbah National Highway-44E ha ka shnong Wahlakhaw, Eastern West Khasi Hills District.
Ka tyllong khubor ba la ïoh na ki Pulit ka Mairang Police Station ka iathuh ba kane ka la jia ha ka miet 11 tarik Kyllalyngkot 2025 ha ka por kumba 11:00 baje mynmiet ha kaba ka kali Sumo kaba don ia u nombar NL01P-3949 ba la shong da ki lai ngut ki briew kaba dang wan na ka thaiñ Mairang ka la leit ban tynrah ia ka trok kit dieng kaba don ia u nombar ML15-1359 kaba dang ¿eng harud ka surok.
Ia ki ar ngut ki longkmie kiba la khladnoh ha kane ka jingjia la tip kyrteng kum ka Kong Bidaris Lyngdoh Lyngkhoi, 50 snem ka rta na ka shnong Pyndengumiong, Mairang bad ka kong Wantilin Kurbah, 32 snem ka rta na ka shnong Ksehkohmoit.
Ia u nongñiah jong ka kali Sumo uba la mynsaw jur la pynkit noh sha Shillong ban ïoh ia ka jingsumar.
