Shillong, ïaïong 11: Ha kawei ka jingjia ba sngewsih kawei ka samla kaba trei shipor kum ka Staff Nurse ha Civil Hospital, Nongpoh kaba la tip kyrteng kum ka samla Phyllashisha Lynser, 25 snem ka rta na ka shnong Umbir Lawsyiem, Ribhoi District ka la khladnoh hashen hadien ba ka kali Maruti Alto ba ka shong kaba don ïa u registration number OR02 AG-7804 ka la leit tynrah nadien jong ka trok ha surokbah National Highway-6 hajan ka shnong Lumumpih ha Ri Bhoi District ha ka sngi Thohdieng ha ka por 11:00 baje mynmiet.
Kane ka trok ka dei kaba don ïa u registration number ML10 C 0234 ka dei kaba la ñiah da u Bah Shiningstar Nongbri, 21 snem ka rta na Eastern West Khasi Hills District katba ïa ka kali Maruti Alto la ñiah da u Bah Chirub L. Nonglait, 27 snem ka rta na ka shnong Iewrynghep, Mawlai, Shillong.
Ha kane ka jingjia u Bah Chirub bad ka samla Phyllashisha kiba la mynsaw jur ki la sahkut hapoh ka kali Maruti Alto bad da ka jingïarap jong ki nongïaid lynti la lah ban sei noh ïa kine ki arngut napoh ka kali.
Ka Kynhun ai jingïarap kyrkieh kaba la poi ha kane ka jaka ki la pynkit noh ïa ka samla Phyllashisha sha CHC Umsning hynrei ki doktor ki la pynbna ba ka ladep khlad lypa shwa ban poi ha kane ka jaka sumar, katba u nongñiah jong ka kali u Bah Chirub u dang don mynta hapdeng ka jingshitom kaba jur.
Ki Pulit ki la pyntip ba ïa ka met jong kane ka Staff Nurse kaba la khladnoh la pynkit sha Civil Hospital, Nongpoh, na ka bynta ban leh ïa ka postmortem katba ïa ka trok bad ïa ka kali Maruti Alto la rah noh sha Umsning Police Outpost ban pynlong ïa ka jingtokit.
