Shillong, Nailar 21: Ha kawei na ki jingjia takhuh kali ba shyrkhei kaba la jia mynta ka sngi ka la jia ha ka por kumba 11 baje shiteng mynstep, kane ka la jia aksiden ha Lad Mukhla hajan ka pung Thadlaskeiñ, West Jaiñtia Hills, ha kaba kawei ka trok kaba kit Cement Clinker, kaba don ïa u number UP 76T 1960, ka la tynra ïa kawei ka longkmie, hadien kata kala kylla bad ban halor jong kawei ka Maruti Eeco van kaba don ia u number ML 04E 0731 bad pynjulor ïa kiwei de ki ar tylli ki kali rit.
Ha kane ka jingjia, katei ka trok u la tynrah ruh shwa ïa katei ka longkmie, ka kong Sooki Sari, kaba dei na ka shnong Ladmukhla, kaba dang bahlang bad la i khun rit jong ka, katba ka dang ïaid lynti lyngba katei ka surokbah.
I tei u khunlung ba la tip kyrteng ka Hawasan Sari ba dang 2 snem ka rta, iba la mynsaw jur, la pynkit noh mar mar sha Dr. Norman Tunnel Hospital, Jowai, hynrei la pynbna da ki doktor ba i la khlad noh ha shiteng lynti. Hadien ba la pyndep ia ka jingtohkit bad ka post-mortem ha Civil Hospital, Jowai, la aiti noh ïa ka metiap jong ka Hawasan Sari sha ki bahaïing hasem.
Kumjuh u nongñiah jong ka Maruti Eeco, uba la tip kyrteng u Convince Susngi, uba dei na ka shnong Nangbah, la pynkit ruh mar mar sha Civil Hospital, Jowai, hadien ba la dep ban sei ïa u hadien ba u la sahkut da ki 2 – 3 kynta hapoh jong katei ka kali Eeco kaba la shah ban bad dambit khait. Ia u Convince ruh la pynbna ba u la khlad lypa shwa ban poi sha ka jaka sumar.
Ka jingtohkit bad ka post-mortem halor ka met jong u yn sa pyndep ha ka sngi ban wan.
Ïa ka kong Sooki Sari kaba la mynsaw jur la leit rah sha ka jaka sumar ha ICU jong ka Norman Tunnel Hospital, Jowai. Katba u nongñiah jong kane ka trok u la phet noh na katei ka jaka hadien ka jingjia aksiden.
