Shillong, Nailur, 02: Kawei ka longkmie kaba la tip kyrteng kum ka kong Rilinda Symbei kaba la 24 snem ka rta kaba shong ba sah ha ka shnong Nondeiñ, New Nongstoiñ ka la khlad noh hadien ba ka la shah rong ha ka umsaw katba ka dang leit saitjaiñ ha ka Wah Porjalem kaba hap hapoh u pud shnong jong ka shnong Mawkawah West Khasi Hills District.
Katkum ka thymmei khubor ba la ïohlum na ki Pulit jong ka District ki ïathuh ba kane ka la jia ha ka Lah Sngi u Blei katba kane ka longkmie ka dang leit saitjaiñ ryngkat lang bad 3 ngut kiwei pat ha kaba ki la mih ruh na ïing naduh ka por mynstep.
Shuh shuh la ong ruh ba ha ka por kumba shiteng sngi eiei hadien ba ka bneng ka la hap slap ki la sdang ban ïaphet noh sha ryngkew namar ka jingsdang kiew jong ka um hynrei na ka jingwan kynsan ka umsaw ka Kong Rilinda Symbei ka la shah rong noh ha ka um katba lai ngut kiwei pat ki la lait im.
Na ka liang jong ki pulit ryngkat ka jingsynran lang jong ki Pulit na ka tnat Fire and Emergency Service ki la lap ïa ka met jong ka longkmie ha ka por kumba 4:30 baje janmiet kaba la shakut hapdeng ki maw bad hadien ki Pulit ki la pynkit noh ïa ka met jong kane ka longkmie sha Civil hospital Nongstoin ban leh ïa ki jingdonkam katkum ka ain.
