Shillong, Rymphang, 19: U MP ka Shillong Lok Sabha Constituency u Dr. Ricky AJ Syngkon u la khlad kyndit ha janmiet sngi Palei ha Dr. H. Gordon Robert Hospital, Jaïaw, Shillong.
Katkum ka jingtip ba la ïohlum la ïathuh ba u Dr. Ricky u la kyllon kynsan ha ka por ba u dang ïalehkai phutbol ha Mawiong na ka jingkyndeh shadem.
Hadien kane, mar mar la pynkit noh ïa u sha Hospital bad tang hadien katto katne por la ïoh jingtip ba u la khladnoh.
Kane ka jingkhladnoh jong u Dr. Syngkon ka la long ka jingsngewsih kaba khraw ïa ki paidbah nongshong shnong ka rilum Khasi bad Jaiñtia.
U Dr. Syngkon uba dei u MP ka Voice of the People Party (VPP) u la jop ïa ka elekshon Lok Sabha na Shillong ha u snem 2024 da kaba ïoh 5,71,078 vote.
Tang shu tip shaphang kane ka khubor, ki nongkyrshan ka VPP ki la leit sha Dr. H. Gordon Robert Hospital, Jaïaw, Shillong ban sngewlem halor kane kane ka jingjia kaba la pynkyndit lut ïa kiba bun balang.
U Symbud Myntri Rangbah ka Jylla u Bah Prestone Tynsong tang shu ïoh jingtip u la leit mar mar sha Dr. H. Gordon Robert Hospital, Jaïaw ban ïa kynduh ïa ki bahaïing hasem kiba la mad ïa kane ka jingjia ba sngewsih.
