Shillong, Nailar, 23: U nongiasaid ain bapawkhmat bha na rilum Jaintia u Bah Kynjaimon Amse uba ju long ruh u nongtrei monsngewbha, u la khlad kyndit ha ka jingiatakhuh kali kaba la jia ha ka shnong Dkhiah East, Khliehriat East Jaintia Hills Distirct ha ka por kumba 12.50 mynmiet mynstep ka sngi Thohdieng ha surokbah National Highway-6 bad lai ngut kiwei pat kiba shong lang hapoh kane ka kali ki la mynsaw jur.
Ia ka met jong kine ki lai ngut kiba mynsaw kynthup ia ka met jong u Bah Kynjaimon la pynkit noh sha Khliehriat Civil Hospital.
Ki lai ngut kiwei pat kiba la mynsaw ki dei kiba la tip kyrteng kum u Raja Suchen, uba bat kum u Secretary jong ka Shnong Huroi, u Bah Small Lamin na ka shnong Huroi bad u Bah Fulmoon Nongtdu na ka shnong Lad Sutnga.
Kum u nongtrei mon sngewbha u Bah Kynjaimon Amse dang khyndiat sngi u la ujor sha ka Jaintia Hills Autonomous District Council halor ka jingai No Objection Certificate ia ka Meghatop Cement Private Limited ha ka shnong Wahiajer, Elaka Narpuh ban tei ia ka karkhana dewbilat khlem ka jingmynjur jong ka Dorbar Elaka Narpuh bad halor kane u la byrthen ruh ban mudui ia ka Jaintia Hills Autonomous District Council sha ka Ingbishar High Court lada kam lah ban pynduh noh mardor ia ka No Objection Certificate.
Ha u snem 2017, u Bah Kynjaimon Amse u la long ruh ka sur jong ki paidbah nongshong shnong jong ka shnong Huroi, Hingaria bad kiwei kiwei ki shnong kiba don ha ka thain khappud jong ka ri India bad Bangladesh namar ka jingbym don ia ki surok kiba biang, ki jaka ai jingsumar, ki mobile phone tower bad kiwei kiwei ki jingeh ba ki paidbah ki iakynduh.
Nalor kata, u la mudui pyrshah ruh ia ka Sorkar India bad ia ka National Highway Authority of India ha ka Ingbishar High Court halor ka jingjot rathai jong ka surok naduh Ratacherra shaduh Lumshnong kaba hap hapoh ka National Highway-6 jong ka East Jaintia Hills District.
Shuh shuh kum ban shu pyntip hangne, ba ha u bnai Rymphang, 2023, ka Meghalaya State Legal Services Authority ka la thung ia u Bah Kynjaimon Amse ban trei kum u Legal Aid Counsel na ka bynta ka East Jaintia Hills.
Ia u Bah Kynjaimon Amse la kha ha ka 20 tarik, Kyllalyngkot 1994 bad u dei na ka shnong Umkiang kaba hap hapoh Lumshnong Community and Rural Development Block, East Jaintia Hills District bad tad haduh ka khyllipmat ba un da khladnoh na kane ka sla pyrthei u la bat ruh kum u Assistant Waheh Shnong jong ka shnong Umkiang.
U Bah Kynjaimon u la pyndep ia ka Degree ha ka Ain na Rajiv Gandhi National University of Law, Patiala, Punjab hadien ba u la pyndep ia ka jingpule Higher Secondary na St. Edmund’s College, Shillong.
