Shillong, Nailar, 30: Uwei u samla ba la tip kyrteng kum u Jonathan Rynjah, u khun jong u Bah Rakesh Shabong bad ka Kong Manora Rynjah kiba shong basah ha Mawiong, Shillong, u la khlad kyndit ha Railway Station ha ka jylla Kerela.
Ha ka jingïakren bad u Bah Rakesh Shabong, u la ïathuh ba u khun u la mih na Shillong ha ka janmiet 26 tarik mynta u bnai u la mih na Shillong bad u la thiah miet ha Waiting Room ka Railway Station ha Guwahati bad ha ka step kaba bud u la mih da ka Rel na Guwahati ban leit trei sha Trivandrum, Kerela hynrei ha ka 29 tarik mynta u bnai la ïoh jingtip pynban ba la lap ïa ka metïap jong u.
U kpa u la ong ba u don ka jingsuba sniew halor kane ka jingjia namar naduh ka sngi ba u khun u la mih na Guwahati ka mobile phone jong u ka switchoff beit bad na ka liang jong ka iing ka sem kim shym la ïohlad satia ban ïakren.
U la ïathuh ba u samla Jonathan u la trei teng mynshuwa ha ka jylla Kerela hynrei u la wan phai noh sha la iing ha ka por ba la lynshop ka jingpang khlam Covid-19 bad ka jingleit phai biang jong u ban leit trei sha Kerela ka long namarba ka iing ka sem ka don hapdeng ka jingjynjar.
Hapdeng ka jingjynjar bad jingsngew shem jingeh ha ka ktien ka thylliej, hynrei u Bah Rakesh Shabong bad ka khun kynthei ki la mih na la iing ha ka sngi Saitjaiñ ban leit shaw ïa ka met jong u khun.
“Nga sngew shem jingeh bha namarba ngam nang ïa ka ktien ka thylliej ban ïakren.” ong u Bah Shabong.
U la ïathuh ba ïa ka bai liengsuin la ïarap da u MLA ka Mawlai Constituency u Bah Brighstarwell Marbaniang bad ïa ka bai kali u la hap ban pynlut hi na pla ryngkat ka jingïarap lang jong ki Pulit.
