Shillong, Jymmang 18: U Bah Fullmoon Pyrtuh uba la long uwei na ki nongïalehkai phutbol batbit bha ha ki snem 1979 u la khladnoh na kane ka sla pyrthei ha ka Sngi u Blei hadien ba ka jingpang ka la ban la kumba katto katne por.
Ïa ka met ba dang sah jong u Bah Foolmoon, uba dei u kurim jong i Kong Monalisa Marbaniang, uba la shong la sah ha Lawmali Pyllun Block-2, Ganesh Das Road, yn sa pyndep ha ka 20 tarik, Jymmang, 2025 ha ka por 2:00 baje noh sngi ha u lum jingtep jong ka Balang Prebyterian Mawkhar, ha Lawmali.
U Bah Fullmoon u dei ruh u nongïalehkai phutbol ba la paw bha ka jylla Meghalaya. Kum u khynnah skul jong ka St. Anthony’s Higher Secondary School, Shillong, u Bah Fullmoon u la mikhmat ïa ka skul ha kiba bun ki lympung ïalehkai naduh ki snem 1978 terter. U la mih madan ha u snem ba ka St. Anthony’s ka la ïohrah ïa ka nam lahduh ha ka Subroto Cup.
Ha u snem 1983, u la ïalam ïa ka kynhun ïalehkai jong ka jylla Meghalaya ha ka National School Championship ba la pynlong da ka School Games Federation of India. Namar ka jingtbit ïalehkai jong u, u la shah jied ban leit ïashim bynta ha ka Selection Trial na ka bynta ka Indian School Team ban leit mihkhmat ïa ka ri India ha ka 13th Asian School Football Tournament, ha kaba la ñiew ïa u kum uwei na ki nongthep kol ba tbit tam.
U Bah Fullmoon u la long ruh u nongïalehkai jong ka Wahingdoh Sports Club ha ka First Division jong ka Shillong Football League bad ka Directorate of Soil Conservation ha ka Inter Office League. U la long ruh u dkhot bapura jong ka Shillong XI, ka Meghalaya State Senior Team bad ka Meghalaya Civil Service Team.
Kawei na ki khyllipmat kaba pynsah jingkynmaw ïa u Bah Fullmoon ka long haba ka kynhun jong u la ïoh rah ïa ka nam jop hadien ba u la ïoh ban pynkhih ïa ka jar ha ka jingïakhun pyrshah ïa ka Singapore ha ka 13th Asian Football Tournament, hynrei kaba pynsngewsih bha ïa u ka long ba um shym la shah jied satia ha ka thup First Eleven ban mihkhmat ïa ka Shillong ha ka Bordoloi Trophy kaba la long ha u snem 1979.
U Bah Fullmoon u la ai burom ïa ki jingjop jong u ïa u Fr. George uba la khladnoh, uba la long u Principal barim jong ka St. Anthony’s School, ïa u Bahdeng Rapsang jong ka Blue Max (kaba long ka club ïalehkai barim) bad ïa u Mr. Kabui, uba dei u Coach jong ka St. Anthony’s High School ha kito ki snem.
