Shillong, Naiwieng, 21: U Bah Standling David Khongwir uba long u Symbud Myntri Rangbah barim jong ka Jylla Meghalaya u la khladnoh na kane ka sla pyrthei ha ka step sngi Baar ha NEIGRIMHS Hospital.
Une u rangbah uba la don 90 snem ka rta ia uba ki paidbah ki ju tip kum u Bah SD Khongwir u la khladnoh hadien ka jingpang kaba la bat la kham slem.
U Myntri Rangbah ka Jylla Conrad Kongkal Sangma tang shu ioh jingtip halor kane ka jingjia u la leit sngewlem ha ing jong u Bah Khongwir bad pynpaw ruh ia ka jingsngewsih bad ong ruh ba u Bah Khongwir u dei u riewsaiñpyrthei uba la ih bha bad uba la aiti lut ia la ka jingim ha ka kam shakri paidbah tad haduh ba un da khladnoh na kane ka sla pyrthei.
La synran ia u Myntri Rangbah da ka Myntri ka Koit ka Khiah ka Dr. Ampareen Lyngdoh lem, ka MLA jong ka Sutnga Saipung Constituency ka Kong Santa Mary Shylla bad u MLA jong ka Sohra Constiteuncy u Bah Gavin M. Mylliem. Nalor kine, la sakhi ruh ia u Chief Secretary barim ka Jylla u Bah WMS Pariat bad kiwei kiwei ki riewpawkhmat kiba la leit sngewlem ha ka ing jong u Bah Khongwir.
U la pynpaw ba ka Jylla ka la ithuh ia u Bah Standling kum u briew uba la noh shibun eh ia u synñiang u bynhei ia ka Mawlai Constituency bad ia ka Jylla baroh kawei ha ka jinglong nongmihkhmat paidbah haduh 25 snem kynthih.
“La ju tip ia u (Bah Standling) kum u briew uba ki paidbah ki ieid bad ki ñiew burom bha. Kane ka paw na ka jingioh ia ka jingkyrshan wat hadien ba um long shuh u MLA, watla katta ka jingkyrshan, ka jingieid na ki paidbah ka pynpaw shai ba u dei u nongialam uba kumno,” ong u Conrad.
“Nga la ioh ka lad ban iakren, ban iakynduh bad ban iatrei lang bad u (Bah Standling) ha ki snem ba la leit noh. Ha ka por ba u dei dang long u Rangbah Shnong ngi la iakynduh la katto katne sien. Namarkata, nga la ioh bha ka kabu ban ioh jinghikai na u bad ban ioh iasyllok bun kiei kiei kiba la long ki jingmyntoi,” la iathuh u Myntri Rangbah.
Shuh shuh u la ong ba ka jingkhladnoh jong u Bah Khongwir ka dei ka jingduh ym tang ia ka Mawlai Constituency hynrei wat ia ka Jylla hi baroh kawei.
Katkum ka jingtip ba la iohlum na ki bahaiing hasem, ia ka met ba dang sah jong u Bah SD Khongwir yn pyndep ha ka 24 tarik u Naiwieng, 2023.
U Bah SD Khongwir u la shakri kum u MLA jong ka Mawlai Constituency haduh 25 snem kynthih. U la jop ia ka Elekshon ha u snem 1972 bad u la shakri ia ki paidbah jong ka shnong Mawlai haduh u snem 1993.
Ha ka jinglong nongmihkmat u la Bah Khongwir ula long ruh u Symbud Myntri Rangbah hapoh ka Sorkar jong u bad u Bah Brington Buhai Lyngdoh bad ha shwa kata, u la bat ia ki tnat kiba heh hapoh ka Sorkar jong u Bah Darwin Diengdoh Pugh .
U long ruh u Chairman jong ka State Planning Board bad u la noh synñiang shikatdei eh ban pynwandur ia ka jingkiew irat jong ka jylla.
U Bah Khongwir ula rung sha ka jylli jong ka saiñpyrthei da kaba pyniasoh bad ka Hills State People Democratic Party (HSPDP) bad u la long uwei na ki riewrangbah uba la don bynta ha kaba pynkha pat ia ka United Democratic Party (UDP).
U la long u Rangbah Shnong jong ka shnong Mawlai Nonglum jin haduh 55 snem kynthih .
Ha u snem 1968, u la shakri ruh kum u President jong ka Mawlai Town Dorbar (MTD) haduh u snem 1988.
