Shillong, Jylliew, 26: U Chief Executive Member (CEM) barim jong ka Khasi Hills Autonomous District (KHADC) Bah Teiñwell Dkhar uba dei ruh u MDC jong ka Shella Constituency u la khladnoh na kane ka sla pyrthei ha ka sngi Balang.
U Bah Teiñwell uba la don 62 snem ka rta u la jop nyngkong kum u MDC ka Shella constituency ha u snem 2004 bad bteng ia ka jinglong nongmihkhmat ka Shella haduh ki sngi khatduh na ka jingban ka jingpang kaba la neh katto katne por.
Ha ki saw samoi kyntih ba u la long kum u MDC, u Bah Teinwell u la bat kum u Lamphang jong ka Ïingdorbar Thawaiñ ka KHAD, kum u nongïalam ka Liang Ïatei bad kum u Chief Executive Member.
U Nongialam ka UDP Bah Titostarwell Chyne u la ithuh ba ïa ka met ba dang sah jong u Bah Teiñwell yn sa pyndep ia ka jinglehniam bakhatduh ha ka sngi Thohdieng mynta ka taiew ha ïing sah jong u ha ka shnong Mawlong, Sohra Civil Subdivision.
Ka Executive Committee jong ka KHADC kum ka jingsngew burom ia u Bah Teiñwell, ka la pynbna ban ai shuti shiteng sngi ha ka 28 tarik mynta u bnai ha baroh ki ophis treikam jong ka Council.
Na ka liang jong u Chairman ka KHADC Bah Lamphrang Blah, kumjuh ruh u Deputy Chief Executive Member (Dy. CEM) Bah Pynshngaiñ N. Syiem ki phah ïa ka jingsngewlem sha a kurim bad sha ki khun ki kti kumjuh sha ki bahaïing hasem jong u Bah Teiñ.
