Shillong, ïaïong, 21: Katba ka Balang Catholic ha ka pyrthei baroh kawei ka dang rakhe ïa ka jingmihpat jong u Trai Jisu Khrist na ka jingïap, kyndit kynsan ka la wan ka khubor basngewsih ban pyntip ba u Pope Francis u la khladnoh ha ka 21 tarik, Ïaiong, 2025 ha ka rta kaba 88 snem ha ka jaka sah jong u ha Casa Santa Marta, Vatican.
Ha ka por 9:45 baje mynstep u Cardinal Kevin Farrell, uba long u Camerlengo jong ka Balang Catholic u la pynbna ïa ka jingkhladnoh jong u Pope Francis na Casa Santa Marta.
Halor kane ka jingkhladnoh jong u Pope Francis u Archbishop jong ka Jyllaniambah Shillong Most Rev. Victor Lyngdoh u la phah ïa u kyrwoh sha ki paidriewngeit ban pyntip ba ka Balang baroh kawei ka la duhnoh ïa u khliehduh, u nongmihkhmat jong u Khrist bad u nonghiar pateng na u Petrus Bakhuid. Ka jingkhladnoh jong u ka la long ka jingduhnong kaba khraw haduh katta katta ïa ka Balang bad ïa ka pyrthei baroh kawei.
U Archbishop u la bthah ruh ïa ki Phadar, ki Brodar bad ïa ki Sistar ba katba ka Balang ka dang ïam briew ïa ka jingkhladnoh jong u Pope Francis, dei ban kiar na kino kino ki jingleh rong leh tamasa bad baroh ki skul ba la pynïaid da ka Balang kin khang lut ha ka sngi ontep ïa u Pope Francis (da kaba ai ïa ka jingpyntip ba thikna sha ki bor ba dei peit jong ka tnat Pule Puthi ka Sorkar Jylla).
U la pyntip ba kan sa don ka Mass na ka bynta ka jingjahthait ka mynsiem ba la khladnoh jong u Pope Francis ha ka sngi Baar ha ka por 5.30 baje janmiet ha Ingmanebah Cathedral, Laitumkhrah, Shillong.
Tang shu ïoh jingtip halor kane ka jingjia ba sngewsih na ka liang jong u Myntri Rangbah ka Jylla u Conrad K. Sangma u la phah ïa u kyrwoh sngewlem sha u Apostolic Nuncio sha India u Archbishop Leopoldo Girelli ban pynpaw ïa ka jingsngewsih kthang halor kane ka jingjia.
“Nga sngewsih kthang ban ïa ka khubor halor ka jingkhlad noh jong u Pope Francis, u shakri bashisha jong U Blei. Ba la tip kum u “U Pope jong ki paidbah”, ka jingshida mynsiem, ka jingsngewrit bad ka jinglong ba shisur jong u ka la batai ïa ka jinglong nongïalam ba kynja mynsiem na ka bynta jong ngi bad ka la sawa shabar ki kynroh jong ka Vatican. U la kyrshan ban ïada ïa ka mariang lyngba ka “Laudato Si” kaba pynlong ïa ki ri ka pyrthei ban shimkhia halor kane. Ka jingpynsngew jong u Pope na ka bynta kiba duk, ki nongphetwir bad ki nongshah ban beiñ ka pynpaw ïa ka jingaiti jong u kaba khlem artatien ïa ka jingsngewrit, ka burom bad ka jingïadon bynta lang. Ki jingpyrshang jong u hapdeng ki niam, kum ka Dulir halor ka “Human Fraternity” ka jingpyrta jong u na ka bynta ka jingsuk ha ki jaka ba don jingïakynad ki la pun jingkieng ïa ka jingsngewthuh jingmut bad jingïatylli ha kylleng ki jingïapher niam bad kolshor,” ong u kyrwoh na u Myntri Rangbah.
“Ha ka kyrteng jong ki paidbah nongshong shnong ka jylla Meghalaya, nga tyrwa ïa ka jingai burom bakhraw ïa u Pope Francis na ka bynta ka jinglong nongïalam bad ka jingshakri ba janai jong u. Ai ba ka mynsiem jong u kan shongthait ha ka jingsuk bymjukut,” la pynkut u Myntri Rangbah.
