M.M.Thaïang
U Rev. Fr. Hilarius Lamare, uba long u Phadar Rangbah jong ka Shnat niam Jowai, Diocese Jowai, u la khlad ha ka sngi U Blei ha ka por kumba 7.50 baje mynstep ha Nazareth Hospital Shillong. Ïa ka met ba dangsah la rah sha Jowai bad pynthiah ïa ka hapoh ka Iingmane St. Theresa U Khunlung Jisu, Cathedral Jowai.
Ka jingleit on tep kan long ha ka 7 tarik mynta u bnai ha Lum Jingtep ka Balang Katholik Jowai. Ka jinglehniam kan long naduh ka por 10.00 baje mynstep bad ïa ka jinglehniam yn pyndep da u Most Rev. Ferdinand Dkhar DD, Bishop ka Jowai Diocese.
Ïa u Rev. Fr. Hilarius Lamare la kha ha ka 14 tarik Ïaiong, 1949, ha shnong Nongkynrih, Elaka u Doloi Raliang. U dei u khun uba ar jong ka (L) Aloysi Lamare bad u (L) Lan Dkhar. U la wan na ka iing ka sem kaba tipbriew tipblei bad kaba ieng rasong skhem bha triang ha ka Niam kaba ai U Blei ha ki longshwa manshwa, ka niam kaba ap jingong bad kaba peit na ki dak ki shin jong u jingknia bad na ki dak ki shin jong u Klong u Skaw ha ka suit ha ka shor.
U Kpa, ka Kmie bad ki bahaiing hasem ki long kiba riewblei ha ka Niam u Longshwa manshwa, hynrei ha ka jingïohi bad ka jingshem jinglap jong ki katba nangïaid ka por ka niam kaba ki ngeit ka la nangkuluh bad synjor. Ban shem ïa ka Niam kaba ïasyriem bad ka Niam kaba ai u Blei ha ki longshwa manshwa ka niam kaba don ka jer, ka thoh (Pyrtuid Boo), ka pyneh rngiew (pyneh rangu pyneh pshi), ka ïabam, ka ïasib ïa u Kpu, u Rynsi, kaba don ka Knia ka Khriam (Mass Bakhuid), ka Duwan ka Dupat, ki Langdoh, ki Riblai ym don lait noh na ka Niam Katholik. Hadien ka jingpyrshang jong ki kaba katto katne bnai, ki bahaiing hasem jong u Hilarius (Rev.Fr. Hilarius) ki la raikut ban iehnoh ïa ka Niam U Barim bad pynthymmai ïalade ha ka Niam Katholik. Ki la ïohpdiang ïa ka Baptisma ha ka 14 tarik u April (Ïaiong)1963, sngi saitjaiñ peitmiet Paskha na u (L) Rev. Fr, Elias Tome SDB, u Apostol ka ri pnar ha Iingmane ka Maria kaba la pun khlem pop tynrai (Maria Imaculate) ha Mawkyndeng (Mookyndeng)
U Hilarius Lamare, hadien ba u la pas ïa ka Class-V na St. Dominic M.E. School Mawkyndeng, u la leit beit beit sha St.Paul Seminary Upper Shillong bad u la pyndep ïa ka jingpule naduh Class-VI haduh Class-XII. Ïa ka jingpule Philosophy bad B.A na Christ King bad St. Anthony College Shillong. Ïa ka Theology na Orient Theological College bad na Sacred Theological College Mawlai, Shillong
La pynkyntang Deacon (Langdoh Sohsla) ïa u ( Hilarius Lamare) ha ka snem 1982 da u Bishop ka Tura Diocese u Most Rev. Geoge Malassary DD la bad pynkyntang Langdoh Niam (Priest) ha ka 16 tarik Kyllalyngkot, 1983 da u Archbishop ka Shillong Archdiocese u Most. Rev. Hubert D’ Rossario DD ha Madan Pamsna Laskein, Elaka u Doloi Raliang.
Hadien ka jingpynkyntang Langdoh (Lyngdoh Niam) la phah ïa u ban leit trei ha ka Parish Umsohlait (Ribhoi) kumba hynriew bnai eiei nangta la phah ïa u sha Parish Mawkyrwat ha ka snem 1983. U Councellor ka St. Paul Seminary Upper Shillong ha ka snem 1986 haduh ka snem 1990. Nangta la phah ïa u sha Parish Namdong West Jaiñtia Hills naduh ka snem 1990 haduh u snem 1996. U la sah ha Mawkhar Parish katto katne por bad pyndep ïa ka jingpule M.Ed. Nangta naduh ba sdang ka snem 1997 haduh ka snem 2005 ha Parish Iingmanebah (Cathedral) Laitumkhrah Shillong. U Vicar General, ka Archdiocese Shillong naduh ka snem 2005 haduh ka snem 2011 bad u la sah ha Archbishop’s House Laitumkhrah Shillong.
Ha ka jingkhlad syndet-syndet (kyndit) u Bishop ka Jowai Diocese Rt. Rev. Vincent Kympat DD, u Bishop uba nyngkong eh ka Jowai Diocese, la phah ïa u Rev.Fr. Hilarius Lamare ban shimti ïa ka Jowai Diocese kum u Diocesan Administrator ban pynïaid shipor katba ym pat thung Bishop ïa ka Jowai Diocese. U la shimti kum u Diocesan Admnistrator ha ka 10 tarik Nailar, 2011 bad neh ha ka kam haduh u April (Ïaiong) 2014. Haba la wan shimti u Archbishop ba la shongthait ( Emeritus) Guwahati Archdiocese u Most. Rev. Thomas Menamparampil SDB, DD kum u Apostolic Administrator ka Jowai Diocese, ïa u Rev. Phadar Hilarius Lamare pat la thung kum u Parish Priest jong ka Shnat niam Jowai (Parish Priest ka Parish Jowai) bad u la shimti ïa ka kam ha ka 24 tarik Kyllalyngkot, 2015 bad ha kajuh ka por u bat ïa ka kam Vicar General ka Jowai Diocese. U long u Parish Priest ka Parish Jowai naduh ka 24 tarik Kyllalyngkot, 2015 bad u la bat ïa ka kam haduh ka sngi ba u la khlad (05/10/2025) ha Nazareth Hospital Shillong.
U Rev. Fr. Hilarius Lamare u long ruh u Freeland Journalist. U la long arsien arwat u Editor ka Iing Khristan (ka Kot Khubor Niam Katholik) kaba mih shisien shibnai na Shillong ha kajuh ka por u long ruh u Akhia, u Nongthoh kot bad u Nongthoh Articles.
Kum u nongthoh kot u la pynmih shibun ki kot kum ka (1) Tei ïa ka longiing longsem halor u Mawsiang, (2) Pynkhreh ban pdiang ïa ka Sakrament Jingpynskhem, (3) U snem ki paidriewngeit Katholik, (4) Ki Samla ka lawei baphyrnai ki Iing ki sem, ki Balang ha ka imlang sahlang, (5) Ka jingkhot ban long Khristan, (6) Ki Nongtreilang ha ka Brisoh Waiñ U Trai, (7) Ki Sakrament ki long ka jingim ki Nongbud U Khrist, (8) Ka Riti mane Blei, (9) Ka Lyngkha baïar, (10) Sharai ïa la ki ‘Langbrot, (11) Kaei ka Maria Theisotti?, (12) Hato phi dang ngeit ?, (13) U thlen ha ka imlang ka sahlang bad kiwei de ki kot kiba u la pynmih na ka por sha ka por.
U Rev. Fr. Hilarius Lamare, u briew uba ïar ka jingmut jingpyrkhat, uba ïohi jngai la ha ka kam met ne ka kam mynsiem, uba ïaishah ïa ka jingkren bein bad u bym dawa jingïaroh bad u long ruh u Spiritual Director jong ka St. Vincent De Paul, Jowai Area Council Diocese Jowai bad hapoh ka jingai mynsiem jong u, ka Society St.Vincent De Paul ka la ïaid shaphrang ha kaba shna ïa ki iing baduk, Alternative Health Centres bad kiwei de ki kam babha ïa la ki parabriew ïa kiba ka Society kam shym la pynbna ne put turoi.
Nangta ha ka por ba u long u Diocesan Administrator la tei ïa ka Joseph Nardini Seminary ha Ummulong, hapoh ka jingpeit jingkhmih u Sohblei Ferdinand Dkhar Procurator ka Jowai Diocese (mynta u long u Bishop ka Jowai Diocese) bad mynta la ïoh ïa ka Seminary kaba heh kaba itynnat kaba long ruh ka shlem saiñdur na ka bynta ki khun samla jong ka Balang ban pyrshang ban poi sha ka jinglong Lyngdoh Sohblei hapoh ka Balang.
U (L) Rev. Phadar Hilarius Lamare, u long uwei na ki nongshna ïa ka iing U Blei ha kane ka pyrthei bad kane ka paw na ka jingshimkhia jong u ban tei ïa ka Iingmanebah (Cathedral jong ka Diocese) kaba ieng mynta halor lum kaba mar pyrshah ïa ka iingskul Marian Hill Higher Secondary, hynrei pat um shym la lah ban ïohi ba kan dep naba U Blei Uba shna iing ïa u ha bneng u la dep shna bad la khot ïa u ban wan shong wan sah ha kata ka iing kaba U Blei u la dep shna ïa u bad u Rev. Fr. Hilarius Lamare um don por shuh ban pyndep shna ïa ka Cathedral kaba dei ka iing U Blei, u la shah khot ha U Blei ban wan shong noh bad hadien ba u la pynkhreh naduh ka 18 tarik u Nailar 2025 bad u la mih noh na kane ka pyrthei ha kane ka 5 tarik Risaw, 2025 ha ka por 7. 50 baje mynstep na Nazareth Hospital Shillong.
U Phadar Hilarius Lamare u la long u Lyngdoh Sohblei mynta la sawphew ar snem bad ha kine ki sawphew ar snem, u la khot ïa u Jisu manla ka sngi ban hiar halor ka Duwan bad u Jisu um ju pep ban hiar kum U Blei ha ka dur jong u Kpu haba khot u Phadar Hilarius bad ha ka jingpyrkhat briew u Phadar Hilarius bad U Jisu ki ïalong paralok bha bad kum u paralok U Jisu un khot sngewbha ïa u Phadar Hilarius sha ka iing kaba u Jisu u la dep pynkhreh na ka bynta jong u.
