Shillong, Nailar, 05: U Lat barim jong ka jylla Meghalaya u Satya Pal Malik u la khladnoh na kane ka sla pyrthei ha ka rta kaba 79 snem ha ka 5 tarik mynta u bnai.
U Satya Pal Malik u la long teng u Lat barim jong ka Jammu and Kashmir, Goa, Odisha bad Bihar.
Ïa kane ka jingkhladnoh jong u Satya Pal Malik la pynthikna ruh da ka Ram Manohar Lohia Hospital kaba don ha Delhi hadien ba u la shitom la kham katto katne por na ka jingpang shini, hypertension bad kiwei kiwei ki jingpang kiba ban ïa ka met jong u.
U Malik u la rung sha ka jylli saiñpyrthei hapdeng u snem 1960 lyngba ki saiñpyrkhat jong u Ram Manohar Lohia. U la pynïasoh bad ka Bharatiya Janata Party (BJP) ha u snem 2004 bad u la shah thung kum u National Vice-President ha u snem 2012 bad u la long u dkhot ha ka kynhun jong u Myntri Rangbahduh ka ri u Narendra Modi haba ka la don ka elekshon sha Lok Sabha ha u snem 2014.
U Malik uba dei na ka jaidbynriew Jat, ha ka jylla Uttar Pradesh, hadien ba u la mih noh na ka BJP u la pynïasoh sha ka seng Congress ha u snem 1980 bad u la long ruh u General Secretary jong ka Uttar Pradesh Congress Committee (UPCC) bad u la shah jied kum u MP ka Rajya Sabha shwa ban mih noh na ka Congress ha u snem 1987 hadien ka jyrsieh bamsap thied suloi Bofor. U la long uwei na ki nongseng ïa ka Jan Morcha kaba la kylla kyrteng sha ka Janata Dal ha u snem 1988.
Ha ka jingïaid lynti jong u ha ka saiñ pyrthei, u Malik u la shah thung nyngkong eh kum u Lat ka Bihar ha u snem 2017. Hadien kane, u la shah thung pat sa kum u Lat ka Jammu and Kashmir ha u Nailar, 2018. Nangne u la shah pynkynriah noh ban shimti kum u Lat ha ka jylla Goa ha u bnai Risaw, 2019 bad tang khyndai bnai, u la shah pynkynriah pat sa sha ka jylla Meghalaya ha kaba u la shongthait noh ha ka 4 tarik, Risaw, ha u snem 2022.
U Myntri Rangbah ka Jylla Meghalaya u Conrad K.Sangma u la pynpaw ïa ka jingsngewsih tang shu ïoh jingtip halor ka jingkhladnoh jong u Malik bad ong ruh ba ka jylla Meghalaya kan ïai kynmaw tympang ïa u synniang u bynhei ba u Malik u la noh sha u sup u thiar jong ka imlang ka sahlang mynba u dang long u Lat ha ka jylla Meghalaya.
