Shillong, K’lyngkot, 27: Ka Bharatiya Janata Party, Meghalaya Pradesh ha ka Lah Sngi U Blei ka la pyllait paidbah ïa ka manifesto lane ka mat treikam na ka bynta ka elekshon sha ka Khasi Hills Autonomous District Council bad sha ka Jaintia Hills Autonomous District Council ka ban sa long ha ka 21 tarik, Rymphang 2025.
Katkum kane ka mat treikam ba la pyllait paidbah da u President ka party u Rikman G.Momin, ka BJP ka la kular ba lada ka ïoh thaw ïa ka Executive Committee ha kine ki ar tylli ki Autonomous District Council kan pynïoh noh da ka jingsiew tulop ïa ki Khlieh Nongsynshar bad ka kular ban ai jingïarap pisa haduh 2000 hajar tyngka shi bnai ïa ki nongbylla sngi kum ki nongtrei kynta, ki nongniah taxi, ki longkmie ba la khlad noh u kurim, ki longkmie kiba kyrshan dalade ïalade ïa kiba yn sa pyntreikam lyngba ki Dorbar Shnong.
Namar ka jinghiar palat ka khajna na ka jingkhaii dewiong ka BJP ka la kular ban sdang noh ïa ka jingtih dewiong katkum ka jingbthah jong ka Iingbishar Supreme Court ban pynkiew ïa ka jingïoh lum khajna jong ki Autonomous District Council.
Nalor kata, ka BJP ka la kular ban pynneh pynsah ïa ka kolshor jong ka jylla nalor ka jingpynkhlain ïa ka jingsumar dawai kynbat ryngkat ka jingïatreilang bad ka Ministry of AYUSH ka Sorkar India.
Ka BJP ka la kular ruh ban thung da ka Committee ka ban khmih bniah ïa ka jingpyntreikam ïa ki skhim paidbah hapoh ki Autonomous District Council bad ka kular ruh ba ki Autonomous District Council kin pynmih ïa ka tnad ka ban khmih bniah halor ka jingbei tyngka na ka bynta ban seng kam sengjam jong ki samla trai jylla kiba la nang la stad ha ryngkat ka jingïatreilang bad ki Syiem, ki Dolloi bad ki Dorbar Shnong.
Halor ka jingpynbeit thymmai ïa ka Sixth Schedule, ka BJP ka la kren shai ba kan buddien ïa kane ka mat khnang ban pynkiew ïa ka jingdon jong ki MDC ba shu sieh hapoh 6 bnai bad ha kajuh ka por ka BJP ka la dawa ba uwei u MDC ban shu sieh u dei ban long uwei Syiem ha KHADC bad uwei u Dallloi ha JHADC.
Ka BJP ka la kular ruh ba kan wanrah da ki buit thymmai ban pynmih pisa na ki jaboh jabaiñ kiba mih na manla ki Hima bad ki Elaka bad ban ai jingïarap mar mar na ka Council na ka bynta ban thied ïa ki kor ki bor kiba lah ban pynïakhlad ïa ki ñiut bad ki jaboh jabaiñ.
Shuh Shuh ka BJP ka la kular ruh ban wanrah ïa ka thungkam thungkam kaba khuid hapoh ki Autonomous District Council.
 | ReplyForwardAdd reaction |
