Shillong, Jymmang, 05: Ka Meghalaya Commercial Truck Owners and Driver Association (MCTO&DA) Jaiñtia Hills Unit ka la pynbna ban pynlong da ka jingïakhih ba khlem buh por hadien ba ki bor ba dei khmih jong ki karkhana pynmih Coke kiba don ha rilum Jaiñtia ki la kyntait ban ai kit mar namar ka jingbym ïabeit ha ka dor ka mur.
U General Secretary jong ka seng u Bah Shanborlang Suchiang ha u kyrwoh ba la phah sha ki lad pathai khubor u la ong ba ka jingaipor khatduh ïa ki trai jong ki karkhana pynmih coke ka la kut noh ha ka 5 tarik, Jymmang, 2025 hynrei kam shym la don satia kano kano ka jingai jubab na ki trai karkhana.
“Ngi kyrpad ïa ki para dkhot ba kin ïatreilang bad ka rai ba la shim da ka seng na ka bynta ka jingmyntoi jong ki trai trok bad ki nongñiah kali,” u la ong.
