Shillong, Jymmang, 14: Ki nongshong shnong jong ka shnong Lapangap, West Jaiñtia Hills District kim shym la ïohlad satia ban leit sha ki lyngkha rep hadien ba ki Pulit ka Jylla Assam kim shym la shah namar ka jingsheptieng ïoh ïa ka mih ka jingïakulmar bad ki jaidbynriew Karbi na ka shnong Tahpat bad na kiwei kiwei ki shnong khappud ha West Karbi Anglong District.
Kumba ka Sorkar ka la khlei ïa ka jubanlak ha ka sngi Balang, ar pyrton ki Pulit ka jylla Meghalaya ki la hiar sha ka shnong Lapangap ha ka step sngi Palei ryngkat ka jingsynran lang u Superintendent of Police ka West Jaiñtia Hills u Jagpal Singh Dhanoa.
Naduh ka por 9 baje eiei mynstep kumba 20 ngut ki nongrep kiba la rah la ki mohkhiew ban leit puh leit daiñ sha ki lyngkha ki la shu shong lynga da ki kynta katba ki bor Pulit ka West Jaiñtia Hills ki dang ïakren bad ki Pulit ka Assam kiba shong ktem beaiñ ha u lum Pynthor uba dang hap shapoh u pud u sam jong ka shnong Lapangap.
Namar ka jingbym ïohlad ban leit sha ki lyngkha, ha ka por 3 baje noh phai sngi ki nongrep ki la hap ban leit phai noh sha la ïing.
Ha ka jingïakren bad ki lad pathai khubor, u SP ka West Jaiñtia Hills District u Jagpal Singh Dhanoa u la ong, “ki Pulit SF-10 ki dang don ha lynti mynta ban wan na Shillong shane bad lehse ha ka por janmiet lane lashai mynstep kin sa wan poi.”
“Ka jaka ka dei ka nongkynti jong ki paidbah ka shnong Lapangap. Ka aiñ ka shai bha, kino kino kiba pynwit ïa ki (nongrep ka Lapangap) kin ngat ha ka jingeh katkum ki kyndon jong ka aiñ,” u la ong bad bynrap, “ngi hap ban sngewthuh ruh ba ngi hap ban treikam katkum ki kyndon aiñ. Ki la kyrpad ïa ngi ban phah ïa ki nongmihkhmat ban ïakren halor kane ka jingeh bad ngi la mynjur, kata, tang na ka bynta lashai bad nangta ngin sa shim ïa ka rai tang shu ïoh ktien na ka liang ki Karbi. U pud u sam u don hapdeng ka jingïakajia hynrei ka jinglong trai (ïa ki lyngkha) kam don satia ha ka jingïakajia,” u la bynrap.
U la ong ruh ba naduh ka por mynstep ka jingthmu hi ka long ban synran ïa ki nongrep kiba leit naduh mynstep sha lyngkha ban sdang ïa ka rep ka riang. “Nga la ïoh jingtip ba ka jaka rep ka don shalyndet ka ktem sah ki Pulit Assam. Ngi donkam ïa ka jingïatreilang jong ki kumba ki la ai ka jingïatreilang ha ka por ot kba ha ka samoi baladep bad kum u ophisar uba peit ka shongsuk shongsaiñ, kano kano ka jingpyndonkam ïa ka bor ka lah ban mih kano kano ka jingjia ba sngewsih,” la ong u SP.
Haba pynshai ïa ka jingbym ïoh leit rep ki nongrep ka Lapangap, u SP u la ong, “khnang ban ïada ïa kano kano ka jingjia ne ka jingjulor, nga la kyrpad ïa ki nongrep ban ïaishah na ka bynta shi sngi bad ailad tang shi sngi ïa u Local MLA na ka liang jong ka Assam bad ngi kyrmen ba ka rep ka riang kan sdang biang da kaba pynneh ïa ka shongsuk shongsaiñ shi rta.”
