Shillong, Nailar, 19: U Nongïalam jong ka Liang Pyrshah ka Khasi Hills Autonomous District Council (KHADC) u Bah Titostarwell Chyne u la ïathuh ba u Chief Executive Member (CEM) jong ka Khasi Hills Autonomous District Council (KHADC) u Bah Shemborlang Rynjah um shym la lah satia ban ai jubab halor ka jingkylli ba la buh da ki MDC ka Liang Pyrshah halor ka jingai jong ka Council ïa ka Labour License sha ki briew kiba nabar ka jylla kiba trei bylla hapoh u pud u sam jong ka Khasi Hills Autonomous District Council.
Ha ka jingïakren bad ki lad pathai khubor u Bah Chyne u la ïathuh ba u Bah Rynjah u la ïathuh ba ma u ruh u dang shu ïoh jingtip mynta ka step halor kane bad un sa pyrshang ban kylli na u Executive Member uba khmih ïa ka tnat Labour bad un sa pyntip halor kane.
U la ïathuh ba ki MDC ka Liang Pyrshah ki la kyntu ïa u CEM ba un khot da ka jingïalang ïa baroh ki MDC jong ka Council kynthup ruh ïa ki khlieh nongsynshar shnong bad ki nongsynshar Hima ban ïathir ïatai ha kaba ïadei bad ka jingpyrkhing ïa ka rung ka mih laitlan jong ki mynder ri bad ki briew kiba nabar ka jylla Meghalaya shapoh u pud u sam jong ka Khasi Hills Autonomous District Council.
U Bah Chyne u la ong ba kane ka jingkyntu ka long halor ka jingsngewkhia ïa ka jingwanrung tuh jong ki mynder ri ban leh ïa ki kam pyntriem khamtam eh ïa ka jingjia ba dang shu jia dang shen ha ka shnong Rongdongai kaba hap hapoh ka South West Khasi Hills District kaba don markhap bad u pud u sam jong ka jylla Meghalaya bad ka ri Bangladesh.
