Shillong, Nailar, 04: Ki nongïalam bad ki dkhot jong ka Federation of Khasi Jaiñtia & Garo People,(FKJGP) South West Khasi Hills District Unit hapoh ka jingïalam jong u President u Bah Kenesjune Lyngdoh Nonglait bad u Secretary u Bah Balse Kharbani ha ka Lah Sngi u Blei ki la leit khynra Trading Licence ha ka shnong Nongjri, Umsur bad Nonghyllam kiba don hapoh u pud u sam jong ka South West Khasi Hills District.
Ha ka jingkhynra ki la shem ba bun na ki dukan ba la pynïaid da ki bar jylla kim don satia wat ka Trading Licence na ka Khasi Hills Autonomous District Council (KHADC) bad nalor kata la lap ba ki don ruh ki dukan jong ki bar jylla kiba la khang khyrdep hi hadien ba ki la ïohi ïa ka jingkhynra Trading License da ki dkhot jong ka seng.
Ha ka jingkhynra, ka seng ka la lap ba ki don pat katto katne ki dukan kiba biang ki kot ki sla bad trading licence katba ïa ki dukan ki don ïa ki kot ki sla kiba biang la khang khyrdep bad la maham ba kim bit satia ban plie tad ynda ki la lah ban pynbiang shwa ïa ki kot ki sla.
Ka seng ka la kyntu ïa ki paitbah nongshong shnong ha ka shnong Nongjri, Umsur bad ha ka shnong Nonghyllam ba kin long ruh kiba peitngor ka jingrung kyrthep jong ki briew kiba nabar namarba ka seng ka la pyntip ba kan sa buh da kawei ka khyrdop ban peitngor ïa ka rung ka mih jong ki briew kiba nabar namarba la ïohi ba bunsien ki don ki briew kiba shong ha ki kali hynrei ynda la poi ha kine ki jaka ki shu sakma kylleng khlem lapdien shuh ïa ki.
