Shillong, K’lyngkot, 13: Ki nongïalam shnong jong ka Dorbar Shnong Umshangling ha ka Lah Sngi u Blei ki la ïakynduh ïa u Deputy Commissioner jong ka Ri Bhoi District u Abhilash Baranwal ban aiti ïa ka jingujor halor ka jingbym tep bha ha ka rukom kaba dei ïa kawei ka metïap bym don satia ba kam trai ha ka jaka tep briew kaba don ha ka shnong Umshalangling.
Ki paidbah kiba sngewkhia ïa kane ka jingleh tang dep rukom, ki la pynpaw ïa ka jingsngewsih namarba ïa ka met ïap ba la shu tep malu mala la khlong da ki ksew kat haduh ba ka la pynher syrngiew ïa ki paidbah hapoh ka shnong Umshangling baroh kawei.
Hapoh ka jingïalam jong u Rangbah Shnong u Bah James Maiong bad u Secretary u Bah Vincent Sohkhwai, ka Dorbar Shnong ka la kyntu ïa u Deputy Commissioner ban shimkhia mardor ïa kane ka kam namarba kum kane ka jingjia ka ktah ruh wat ïa ka koit ka khiah jong ki paidbah.
Ha ka jingïakren bad ki lad pathai khubor u Rangbah Shnong u la maham ba lada ki bor synshar kim lah ban leh eiei noh halor kane ka jingdawa, ka Dorbar Shnong kam banse ban ym shah shuh ban tep, ïa ki metïap jong ki briew ki bym don ba kam trai, ha ka jaka tep briew kaba don hapoh u pud u sam jong ka shnong.
U Deputy Commissioner ka Ri Bhoi u Abhilash Baranwal u la kular ba un sa khot jingïalang noh mardor ïa ki ophisar na ka tnat Pulit, ïa ki nongïalam jong ka Nongpoh Town Committee ban ïakren sani halor kane ka kam khnang ba kan ym jia eiei shuh nangne shakhmat.
