Shillong, Risaw 31: U Myntri Rangbah ka jylla u Conrad K Sangma u la ïada ïa ka rai jong ka sorkar ban pynlong ïa ki tamasa, ba kynthup ïa ka Shillong Cherry Blossom festival da kaba ong ba la khmih lynti ba kan wan ka jingïohnong kaba heh.
U la pynpaw ba ka sorkar kan lah ban ïoh lum kumba T. 130 klur tam na ka jingpynlut kaba long T.20 klur kaba la leh ha ki snem ba la dep, da kaba ong ruh ba kine ki tamasa kin ai ka jingmyntoi ïa ka ïoh ka kot.
“Malu mala kumba T. 20 klur la pynlut bad ngi la lah ban ïohnong lajan T. 130 klur. Kumta kine ki dei ki jingkheiñ ba shai kaba pyni ba ki concert bad ka ïoh ka kot sawdong ki tamasa ki long kiba myntoi bad sakhi ba ki aikam aijam,” ong u Sangma sha ki lad pathai khubor.
U la ong ba haba peit ïa ki kam pynroi la lah ruh ban ïohi ba ki la long ki jingmyntoi.
U la banjur ba ki tamasa kum ka Cherry Blossom ki la synniang ïa ki jingpaw nam jong ka Shillong kum ka nongbah jngohkai pyrthei.
