Shillong, Nailar 26: Ki Nongïalam ka HYC sengkmie kiba kynthup ïa u President Bah Roy Kupar Synrem, u Vice President Bah Donbok Kharlyngdoh, u General Secretary Bah Rhembor Saibon, u Secretary Bah Isaac Basaïawmoit, u Education Secretary Bah Enlang Sawian ki la shah khot hajir hapoh ka District and session Courts ka Ïingkashari jong ka 1st Magistrate court halor ka jingshah kynnoh bad shah pynngat ha ki kyndon aiñ bapher bapher haba ïadei bad ka jingjia ha ka 4 tarik u Ïaïong mynta u snem.
U Nongïalam ka HYC haba ïakren bad ki lad pathai khubor hadien ba la dep ka jingshah khot hajir u la ong ba ka seng ha ka 4 tarik u Ïaïong mynta u snem ka la leit ban ïakynduh ïa u Director ka NEIGHRIMS halor ki mat jingdawa bapher bapher kiba ktah ïa ki samla ka jylla bad ki trai ri trai muluk bad hadien ba la kut ka jingai por la seng ka la kut ba ka NEIGHRIMS kan jubab, kumta ki Nongïalam bad dkhot ka seng ki la leit ban kynduh ïa u Director da kaba khot shabar ka kamra ban ïakren bad ban pan ka jubab, bad u Director u la ai ka jubab hadien 1 kynta shiteng bad hadien kane la pynlong ka jingïalang hapoh Conference Room bad ka jingïakren ka la long kaba bha bad ba sngewtynnad, hynrei hadien ba la dep ka jingïakynduh na ka liang ka NEIGHRIMS ka la ujor ejahar kylla pynban ïa ki nongïalam ka seng.
U la pynpaw ruh ka jingsngew lyngngoh ruh ba ki pulit tang hapoh 2 bnai ki la pyndep ka jingtohkit bad ki la chargesheet bad pynngat ha ki kyndon bapher bapher kiba na ka liang ka khlem leh satia.
U la ong ba kane ka dei ka sienjam nyngkong ba ki pulit ki kloi ban tohkit bad pynngat kyndon katba kito ki nongkhaiï drok kiba heh, kumba jia ha Mawlai kim shah pynngat kyndon ne pyndep ïa ka jingtohkit, kumta u la kyntu ïa ki Pulit ban tohkit lang da kajuh ka tarajur ka bym nohshilliang.
U la ïathuh ba ha ka Chargesheet ka seng ka la shah kynnoh ba ka la ktah kti ïa u Director ka NEIGHRIMS, ka jingleit pynthut ïa ka jingtreikam jong u, bad ka jingsei jubor ïa u Director napoh ka kamra treikam jong u nalor kiwei kiwei pat ki jingshah pynngat kyndon.
“Ngin ïatreilang beit hi bad ka Ïingbishar halor kane ka jingshah khot hajir tat haduh ban da la dep ban bishar bad na ka liang ka seng ruh kan ym shongthait ban trei na ka bynta ka bha ka miat, ka jingmyntoi jong ki samla trai ri trai muluk kiba don ha ka jylla,” ong u President ka HYC u Bah Roy Kupar Synrem.
Katba u Vice President ka seng u Bah Donbok Kharlyngdoh u la ong ba kane ka jingshah khot hajir ka seng ka lah ban long ba ka don ka jingïasylla hapdeng u Director ka NEIGHRIMS bad ka sorkar ban khanglad ïa ki kam jong ka seng kaba leh na ka bynta ka jingmyntoi jong ki samla ka jaitbynriew.
