Shillong, Naitung, 16: Ki Pulit jong ka Sadar Police Station ha ka sngi Baar ki la khot hajir ïa ki hynriew ngut ki dkhot jong ka KSU Shillong Mihngi Circle.
U dkhot ka KSU Shillong Mihngi Circle u samla Colford Khyriem ha ka jingïakren bad ki lad pathai khubor ynda la mih na Sadar Police Station u ong ba kim don jingtip eiei halor ka jingthmu jong ki Pulit haba ki khot hajir ha kaba ïadei tang bad ki jingkhynra nongbylla bar jylla ha ka thaiñ Polo.
“Na ka por sha ka por ki ïai khot (hajir) bad ha kine ki ba la leit ruh bun na ki nongïalam jong ngi kiba la shah khot (hajir) bad ngim don jingsngewpher shuh. Ngi pynrem ïa ka tnat Pulit ba ka long kumba pyndik ïa ngi tang na ka daw i kam barit ban khot (hajir) na ka por sha ka por,” u la ong.
“Ha ka jingshisha ka (tnat Pulit) dei ban khot hajir lang ïa ki Kontraktor kiba pynkheiñ ïa ki kyndon jong ka aiñ haba ki wan ïalam ïa ki nongbylla nabar jylla khlem ki kot ki sla kiba biang bad haba ki khot (hajir) ïa ngi ki dei ban khot (hajir) ïa ki ruh,” u la ong.
Haba kylli, u la ïathuh, “ka jingtohkit jong ki Pulit ka shu long la ki don bynta neem ha ka jingkhynra Trading License bad ki don ki dkhot jong ngi kiba don bad ki don ki bym don. Ki (Pulit) la pynthikna ba ym don kyndon eiei.”
U Organising Secretary jong ka KSU Seng Kmie u samla Raymond Kharjana uba la leit synran lang sha Thanat u la ong, “kane kam dei ka sien ka banyngkong haba wat ki dkhot kim don wat tang hapoh Shillong ruh hynrei la pynpoi ïa ka shithi khot hajir. Kane ka pyni ba ka don ka jingthrang dikdik jong ki bor ba dei khmih ban pyntyrha bad ban pynduh mynsiem ïa ki dkhot jong ngi.”
“Kane ka rukom leh ka long ban pyntieng pynsmiej ruh wat ïa ki parasamla ban ïadon bynta hapoh ka seng ba lada phi don hapoh ka seng phin ngat ha kum kine ki jait case bad jingshah khot hajir na ka por sha ka por,” la kynthoh une u nongïalam ka KSU.
“Kumba ngi la ieng skhem la 46 tylli ki snem ngim salia bad ngim sngewpher shuh ïa ki jingshah khot hajir hynrei kaei kaba kongsan ba ngi dei ban leh ngin ïaid shakhmat ban pyndep ïa la ka jong ka kamram. Kaba kham sngewthamula ka long ba la tip pylleiñ pylleiñ ba ka don jingpynkheiñ ïa ka Inter State Movement Act ruh na ka liang jong ki Kontraktor hynrei haduh mynta ngim pat ïohi ïa uwei ruh u Kontraktor ban shah khot hajir ha kaba ïadei bad ka jingpynkhein jong ki ïa ki kyndon aiñ,” u la bynrap.
U la kynthah ruh ïa ki jingleit khynra nongbylla bar jylla da ki Pulit jong ka Anti-Infiltration Directore bad ka tnat Labour da kaba ong, “kaba sngew thamula ki leit khynra ïa kaei, namarba haduh mynta ngim lah ban sngewthuh.”
“Ynda ïakren ïa ka Work Permit ka Sorkar ka ong ba kam don kum kata ka jait aiñ bad ka (Sorkar) dei ban pyni da kaba shai ba kam don (kata ka aiñ ba ki nongbylla kiba wan nabar ka jylla Meghalaya ki donkam ïa ka Work Permit). Hynrei katkum ka jingtip ka jong ngi, kane ka aiñ ka la don naduh u snem 2016 bad la pynbeit thymmai ruh naduh u 2011,” u la ong bad bynrap, “haba ka aiñ ka don, hynrei ka Sorkar ka ong ba kam don kum kata ka jait aiñ. Lada ki nongwanrah ïa ka aiñ kim tip ba ka don ka aiñ, u riewpaidbah bapli phin mutdur aiu shuh.”
“Ai kin (Pulit) mat khot, ai kin mat thep case 10, 20 tylli ngim sngewpher hi ruh hynrei kum ki dkhot ba shitrhem jong ka seng bad kum ki shipai ba shitrhem jong ka jaidbynriew ngin dang ïai trei shitom bad ngin dang ïai long dukhi ban pynthikna ba ka jaidbynriew kan long kaba shngaiñ ha ka pateng ka ban sa wan,” u la ong.
