Shillong, Lber, 13: Ka tnat Home (Political) ka Sorkar Jylla ha ka sngi Palei ka la phah da ka jingthoh sha u President ka Khasi Students Union (KSU) samla Lambokstarwell Marngar ban pyntip ba ka Sorkar kan khot ïakren ïa ki kynhun bapher bapher bad ïa ka KSU ban ïasyllok ha kaba pynkhreh ban thaw ïa ki Rules jong ka Meghalaya Investment Promotion and Facilitation Act, 2024.
Ha ka shithi ba la phah da u Commissioner & Secretary ka tnat Home (Political) ka Sorkar Jylla Bah CVD Diengdoh, u la pyntip ba u Myntri Rangbah ka Jylla Conrad K.Sangma bad ki Symbud Myntri Rangbah kiba la shong jingïalang ha ka sngi Baar mynta ka taiew ki la pyntip ba yn khot lang ïa baroh ki kynhun kynthup ïa ka KSU ban ïasyllok ha kaba ïadei bad ka jingthaw ïa ki Rules jong ka Meghalaya Investment Promotion & Facilitation Act, 2024, da kaba shim ïa ka jingai jingmut katkum ka jingïalang kaba la long ha ka sngi Balang hadien ba ka KSU ka la phah da ka dorkhas ha ka 20 tarik, Kylllayngkot, 2025.
“Ïa ki jingpynsngew jong ki kynhun bapher bapher kynthup ruh ïa ka seng jong phi la kynthup lang bad la kdew ha ka Amendment Bill ba la wanrah hapoh ka Dorbar Mang Tyngkajong ka Meghalaya Legislative Assembly,” la ong ka shithi bad bynrap, “kine ki long, ba ka Meghalaya Investment Promotion & Facilitation Act, 2024 kam dei ban shah pynjngut ha kino kino ki kyndon jong ka The Meghalaya Transfer of Land (Regulation) Act, 1971. Ka Meghalaya Investment Promotion & Facilitation Act, 2024 kan ym ïaid lait ïa kino kino ki kyndon aiñ kiba ïadei bad ki Autonomous District Council, ban plie ïa ki lad ïohkam ïohkam – 90 percent yn mang ïa ki kam bym dei hapoh ophis bad 50 percent ki kam ba hap ban trei ha ophis,” la pyntip ka shithi.
Ha kaba ïadei bad ka jingthied jaka beit beit ïa ka Land Bank da ka MIPA, ka sorkar ka la shim ïa ka jingsngew jong phi bad kan sa rah ïa kane ha ka rynsan kaba dei, la bynrap shuh shuh ka shithi na ka tnat Home (Political).
