Shillong, Lber, 26: Ka Meghalaya Schools Welfare Development Association (MSWDA) Central Body ha ka sngi Balang ka la khot bad wer ïa baroh ki President, Secretary jong ki School Managing Committee (SMC), ïa ki nongpeit jong ki skul lane ki nonghikai kiba mihkhmat ïa ka skul ban poi sha ka jingïalang ka ban sa long ha ka na ka bynta ki mat kiba donkam kiba long na ka bynta ka jingbha jong ki skul kiba kynthup ïa ki skul ba la pynïaid da ki NGO, Mission bad ki Private Organisation (Private Aided/Private Unaided) naduh ki Pre-Primary, Primary, Upper Primary, Secondary bad Higher Secondary.
Ha u kyrwoh ba la soi da u President ka Association Bah H. Marbaniang bad u Secretary Bah D. Kharbuli ki la pyntip ba ki mat ba kongsan ban ïakren ki long, halor ka jingthmu jong ka tnat Pule Puthi ban pynbeit ryntih, ban phah ïa ka jingkyrpad sha ka Sorkar ban ithuh ïa ki skul bym dei sorkar tang ha kawei ka kyrdan, kata, Non-Goverment School, ban kyrpad ïa ka Sorkar ban plie lad biang ïa ki nonghikai ki bym pat pyndep ïa ka B.Ed/D.El.Ed, ban kyntu ïa ka Sorkar ban tuklar ne ban shim rai halor ki in-service teacher ki bym pat ïoh ïa ka certificate/marksheet na ka NIOS bad kiwei kiwei ki mat.
