Shillong, Jymmang, 12: Ka Deputy Commissioner jong ka East Khasi Hills Kong R.M Kurbah ha ka Lah Sngi u Blei ka la pynshlur ïa ki samla ban rung sha ka tnat shipai jong ka ri bad ha kajuh ka por ka la pynbna ruh ba la plie ïa ka Coahing Camp bym donkam jingsiew khnang ban ïarap ïa ki samla kin pas bha ha ka jingrungkam.
Ha ka jingïakren bad ki lad pathai khubor, ka Kong Kurbah ka la ong, “ngi kwah ban pynshlur ïa ki samla ba kin rung sha ka kam shipai jong ka ri. Ngi kyrpad ïa ki ban pynrung kyrteng ha ka ophis jong ngi bad ngin sa pynlong ïa ka jingai jinghikai bym donkam jingsiew na ka bynta 30 haduh 45 sngi.”
Katkum ka jingong jong ka, ka ophis DC ka la ïoh pdiang ïa ki aplikeshon na ki 40 ngut ki samla kiba angnud ban ïoh jinghikai.
U ADC Bah Shanborlang Warjri u la ong ba ka jingthmu jong ki bor synshar district ban ai ïa ka jinghikai sha ki samla ki ban ïakhun ïa ka Common Entrance Exams (CEE) da ki jingtip, ki buit bad ki lad hikai ba pynmyntoi hi ïa ki.
“Ki samla jong ngi ki long kiba biang ha ka met ka phad bad kin pas beit hynrei ban pas ïa ka eksamin bun na ki samla jong ngi khamtam na ki nongkyngdong kim don jingtip ïa kiba bniah ne ban leit wad jingtip, lyngba kane ka prokram, ngin sa ai jnghikai bad ngin ai ruh ïa ki lynnong pule na ka bynta ka eksamin bad ngin sa ïarap ïa ki kumno ban thoh ïa ki jingkylli na ki eksamin kiba la dep khnang ba kin dup tip ïa ki lynnong bad kumno ruh kumno ban thoh bad kane kan ïarap ban kyntiew ïa ka jingbun jong ki samla kiba pas,” u la ong.
U la pyntip ba ha u snem 2023 haba la pynsdang ïa kaCoaching Programme bym donkam jingsiew la lah ban ai jinghikai haduh 200 ngut ki samla bad na kine tang 82 ngut kiba la pas ïa ka Common Entrance Exams. Ha kaba kut, 35 ngut na ki 82 ngut ki la ïoh kam bad ki la lah ban pyndep ïa ka physical fitness exam.
Mynta u snem u Bah Warjri u la ong, 40 ngut ki la register na ka bynta ka coaching programme.
Ki samla kiba kwah ban pynrung kyrteng ki lah ban wan sha ka ophis DC ha ka kamra 319 bad ngi ai jingmut ba kin wan shwa ka 15 tarik mynta u bnai khnang ba ngin dup lah kumno ban pyntip ha ka rukom kaba dei bad ba kin dup pas ïa ka Common Entrance Exams ka ban sa long ha ka taiew ba khatduh jong u bnai Jylliew ne ha ka taiew banyngkong jong u Naitung.
