Shillong, Rymphang, 25: Ar ngut ki shi kurim kiba dei ruh ki nongrep na ka shnong Nongsangu, ka shnong kaba don ha them Ri Bhoi ki la wanrah nam bad burom ïa ka jylla Meghalaya da kaba ki la jop baroh ar ngut ha ka jingïamareh Marathon kaba la long ha khappud ka ri India bad ka ri Pakistan kaba don ha ki thain Amritsar jong ka jylla Punjab.
Kane ka Marathon ïa kaba la tip kum ka Bordermen Marathon 2025 ka dei kaba la pynlong da ka tnat shipai Border Security Force.
Kine ar ngut ki shikurim ki long u Bah Tlanding Wahlang uba la jop ha ka kyrdan kaba ar bad u la ïoh rah ïa ka takma rupa bad ka song pisa kaba 50 hajar tyngka katba ka kurim jong u ka Kong Ibapalei Shisha Nongkseh ka la jop ha ka kyrdan kaba lai bad ka la ïoh khur ïa ka takma rnong ryngkat ka song pisa kaba 15 hajar tyngka.
Ka kong Ibapalei ka la ïashim bynta ha ka jingïamareh marathon kaba jngai 10 kilomitar, katba u Bah Tlanding pat u la jop ha ka jingïamareh marathon kaba jngai 42 kilomitar.
Ngi la ïakynduh ïa kine ki ar ngut ki shi kurim ha Meghalaya House ha nongbah Delhi ha kaba ki la ïathuh ba mynta kin ym pat leit phai sha la shnong namarba ki hap ban leit ïashim bynta pat sa ha ka jingïamareh marathon ka ban sa long ha ka 2 tarik, Lber, 2025 ha ka jylla Odisha.
