Shillong, Rymphang, 10: Ka kynhun ïakura jong ka Khadsaw-phra MMA Dojo na ka shnong Mairang, Eastern West Khasi Hills District ka la ïoh ban khur takma ha ka 4th Open International Kickboxing Tournament kaba la long ha K.D Jadhav Indira Gandhi Sports Complex, New Delhi naduh ka 1tarik haduh ka 5 tarik Rymphang, 2025.
Ha kane ka rynsan, ki rang bad ki thei ïakura jong ka Khadsaw-phra MMA Dojo hapoh ka lama jong ka Meghalaya State Kickboxing Association (MSKA) ki lah ïoh khur ar tylli ki takma Rupa bad ar tylli ki takma Rnong.
Kine ki nongïakura ba la ïoh khur takma ki long u Melvin Lyngdoh Marshyllong uba la ïakhun ha ka kyrdan Senior 60 kilo u la jop ïa ka takma rupa, ka heprit Joviality Lyngdoh Kynshi kaba ïakhun ïa ka kyrdan Junior 40 kilo kaba la jop ïa ka takma rupa, u samla Apbantei Marbaniang uba ïakhun ïa ka kyrdan Senior 72 kilo uba la jop ïa ka takma rnong bad u samla Sakibanshai Nongbri uba ïakhun ïa ka kyrdan Senior 54 kilo uba lajop ïa ka takma rnong.
Kine ki nongïakura ki la lah ban jop ïa ki takma ha kane ka lympung ïakura ka long hadien ba ki la ïohlad ban pyntbit ïalade ha ka jaka ai jinghikai Khadsaw-phra MMA Dojo ba la ai jinghikai da u Bah Khrawjutang Kharsyntiew kum u Coach.
Ka Khadsaw-phra MMA Dojo ka ai khublei ïa kiba don bynta ban ai jingkyrshan ha ka jinglut jingstep, kata, ïa u Bah Belltister Rani, Sordar Shnong Mission, u Bah Lawan War uba long u trai jong ka Khadsaw-phra College, u Bah Equator L.Nongrang, khamtam eh ïa u MLA jong ka Mairang Constituency u Bah Metbah Lyngdoh bad ïa kiwei pat ki bym shym la kwah ban pynpaw kyrteng.
