Shillong, Nailar, 02: Ka samla Feliza Hujon kaba la wan ha ka kyrdan kaba lai ha ka 8th International Karate Championship kaba la long ha Netaji Indoor Stadium, Kolkata, West Bengal da kaba ïoh khur ïa ka takma rnong ka la shah pynkup burom ha ka Synjuk ki Nongñiah Taxi Sor bad Khap Sor bad ryngkat ka jingïatreilang bad ka Mawiongrim Taxi Drivers and Owners Association bad kynthup ruh ki nongniah kali kamai ha ISBT Shillong.
Ka samla Feliza Hujon kaba shong basah ha ka shnong Mawiongrim, Shillong ka la leit ïashim bynta ha ka rynsan ïakob jong ka 8th International Karate Championship lyngba ka All Meghalaya Karate Association, Shillong.
Kane ka samla, ka dei ruh ka khun jong ka Kong Shimtibahun Hujon bad u Bah B.L. Nongsiej, uba u dei u nongniah taksi kamai bad uba long ruh ha kajuh ka por u President jong ka Mawiongrim Taxi Drivers And Owners Association.
Ha ka jingpynkup burom kaba long ha ka sngi Palei ha ophis treikam jong ka Association ha Mawiongrim la sakhi lang da u President jong ka Synjuk ki Nongñiah Taxi Sor bad Khap Sor u Bah Kmenlang Khonglah, u General Secretary u Bah Pynsuk D Yuroi bad kiwei kiwei.
