Shillong, Naitung 21: Ki nongtrei jong ka Shillong Municipal Board (SMB) ha ka Lah Sngi u Blei ki la sdang biang ïa ka jingkhynra ïa ki nongdie madan ha Khyndai Lad, Shillong kaba long ka kad khaii kaba heh bha ha ka nongbah Shillong.
Ha ka jingkhynra, ïa ki nongdie madan bym don ïa ka Certificate of Vending (CoV) ym shym la shah satia ban phriang ïa ki mar ki mata hynrei la ailad tang ïa ki nongdie madan kiba don ïa ka Certificate of Vending (CoV) ban shong die jingdie bad la bthah ba kin kin lum noh ïa ki mar ki mata bad ym shym la shah satia ban kin shong die jingdie.
Katto katne ngut ki nongdie madan kiba ju shong die jingdie ha kane ka jaka da ki phew snem ki la pynpaw ba kim shym la ïoh satia ïa ka CoV katba kiba dang shu wan shong die jingdie tang katto katne por ki la ïoh ïa ka CoV.
Kane ka la pynbitar shla ïa kine ki nongdie madan ki bym don ïa ka CoV bad ki la buh ruh ka jingkylli ïa ki nongtrei ka Municipal balei ba ka kyrteng jong ki kam mih satia bad ki suba ba ka lah ban don kaei re kaei kaba shalyndet.
Ki la ong ba kane ka jingbym ïoh ïa ka CoV ka pyni ba ka dei ka jingleh shiliang bad ong shuh shuh, “kiwei kiba don nongïalam ki ïoh (ïa ka CoV) ngi pat ki bym don nongïalam ngim ïoh.”
“Naduh ka por ba dang don ka Assembly kaba rim hangne, ngi la shong ban die jingdie, hynrei kine kiba dang shu wan thymmai ki la ïoh (ïa ka CoV),” la kynthoh kine ki longkmie Khasi kiba ju im kamai jakpoh da kaba kam die madan ha Khyndai Lad.
“Ha ka por ba ki wan sorbe balei ki ïaid lait ïa ngi?” la kynthoh kine ki longkmie.
Ki la kynthoh ruh ba wat haba ki ladep ban aplai ïa ka CoV hynrei ka kyrteng jong ki kam mih satia.
Kane ka jingkhynra jong ka Municipal ka la jia ruh shi sngi hadien ba ka Sorkar dang shen ka la pynmih ïa ka jingpynbna ba ka 22 tarik Naitung, 2025 kan dei ka sngi khatduh ban pynkynriah lut ïa ki nongdie madan na Khyndai Lad sha ki dukan ba ladep pynshna.
