Shillong Nailar, 17: Ka KSU-East Jaiñtia Hill District Unit, ha ka 16/08/25 ka la pynlong ïa Checking Drive ne khynra bar jylla ïa kiba wan rung sha ka jylla Meghalaya lyngba ka surok NH6 kaba pynïasoh ïa ka jylla Assam thaiñ Barak Valley.
Ha kane ka jingkhynra ka seng la ïoh bat bun ngut ki bar jylla ki bym biang ïa ki kot ki sla kum ka Labour Licence, Work Permit, bad kiwei kiwei.
Hadien kane ka seng ka la pynphai biang ïa ki, laitnoh tang ïa kito kiba ïaid na Silchar lyngba ka jylla ban leit sha Guwahati. Ka seng ka la leh ïa kane khnang ban tehlakam ïa ki phetwir suba nong Bangladeshi kiba shah kyndang ha ka sorkar Assam ha ka Eviction Drive kaba dang ïaibteng haduh mynta.
Ha ka jingïoh jingtip ka seng, ba ki phetwir ba shah kyndang ha ka sorkar Assam bun kiba phai khmat sha ka jylla Meghalaya jong namar ki tip ba ka jylla Meghalaya haduh mynta kam pat don ïa ki aiñ kiba lah ban tehlakam ïa ki, ym kum sha kiwei kiwei ki jylla North East kiba la don ïa ka Inner Line Permit.
Kumta na ka liang ka seng ka phah ïa ka khubor sha ka sorkar jylla, ban pyntreikam noh mardor ïa ka ILP, bad nang pyntreikam ruh ïa ka MRSSA da kaba don bniat hapoh ka jylla khnang ban lah ban tehlakam ïa ki bar jylla kiba wan rung sha ka jylla lyngba ki bynta bapher bapher.
Halor kane ka seng ka la rai ruh ba nangne shakhmat kan nang ïai pynkhlaiñ shuh shuh ïa ka jingkhynra bar jylla khnang ban lah tehlakam ïa kano kano ka jingma ïa ka ri bad ka Jaitbynriew, ong ka kyrwoh na u Phanuel Tongper Vice-President KSU Narpuh circle bad ruh kum u Environment Secretary KSU EJHDU.
