Shillong, Nohprah, 04: Ki Pulit ka Anti-Narcotic Task Force (ANTF) Meghalaya kiba la ïoh ïa ka jingtip kaba bniah na ki tnat syntiat ha ka sngi Palei ki la hiar ban khynra ïa ka jaka sah jong uwei u suba nongkhaii drok ha ka slum kaba don ha Lum Survey, sha lyndet ka them Iewmawlong.
Ïa une u snar khaii drok la tip kyrteng kum u Sayed Ali, 28 snem ka rta. Ha ka jingkhynra ïa ka iingsah, ki Pulit ki la ïoh ban kurup ïa u drok uba la phylliew lypa ha ki 40 tylli ki tyndong plastik. Nalor kata ki Pulit ki la ïoh ban kurup ïa u drok ba la thep ha ki ar tylli ki synduk thep sabon.
Baroh u drok uba la ïoh ban kurup da ki Pulit na une u snar nongkhaïi drok u long 24.45 gram. Hadien kane, ïa u snar khaii drok la rah noh sha thanat na ka bynta ban pynlong ïa ka jingtohkit.
Ki Pulit ki la register case ha Sadar Police Station hapoh ka Section 457/830 NDPS Act.
