Shillong, Naiwieng 07: U Chief Executive Member (CEM) ka Khasi Hills Autonomous District Council (KHADC) Bah Pynïaid Sing Syiem ha ka sngi baar ryngkat ka jingsynran lang jong u Executive Member i/c Taxation u Bah Joseph Fantin Lakadong, bad ki Pulit Enforcement ka KHADC, ki bor synshar ka East Khasi Hills bad na Sohra Civil Sub Division ki la hiar sha ka shnong Majai ban khynra naphang ïa ki dukan jong ki bar jylla kiba leh ïa ka khaïi ka pateng khlem da ïoh ïa ka Trading License na ka Khasi Hills Autonomous District Council.
Kane ka jinghiar jong u CEM ka KHADC sha Majai ka long ruh hadien ba 44 ngut ki bar jylla kiba leh ïa ka khaïi pateng ha Majai, ki la pyni bor ïa ka District Council halor ka Trading Licence da kaba leit tied ïa ka jingkhang jong ka Iingbishar Meghalaya High Court na ka bynta ban pynthymmai ïa ki laisen kiba la kut ka por.
Ha kane ka jingkhynra Trading License la sakhi ba napdeng ki 44 ngut ki la khang lypa ïa ki dukan bad kane ka la pynsuba ba imat kim don ïa ki kot ki sla kiba biang ha kaba ïadei bad ka khaïi pateng ha ka shnong Majai.
Nalor kata, la lap ruh ba wat ki bar jylla kiba shong dukan kiba biang ïa ki kot ki sla hynrei kim shym la leh satia ïa ka Professional Tax.
Na ka liang jong u CEM ka KHADC hadien ba la lap ïa ki dukan ki bym don ïa ki kot ki sla kiba biang u la phah khang khyrdep ïa ki dukan bad la bthah ba kin leit mih sha ka ophis jong ka District Council na ka bynta ban pynbiang ïa ki kot ki sla.
Ha kane ka sngi u CEM ba ka kynhun ki la hiar ruh sha ka shnong Ichamati ban khynra naphang ïa ki dukan jong ki bar jylla ki bym don ïa ki kot ki sla kiba biang.
Ha ka jingïakren bad ki lad pathai khubor u Bah Pynïaid u la ong, “dang shen ka Ïingbishar Meghalaya High Court ka la bthah ïa ngi ban ai ïa ka Trading License hadien ba ki la leit tied ïa ka jingkhang jong ka Ingbishar. Ngi ruh ngi don ïa ka Trading by Non Tribal Regulation Act bad ngi ruh hap ban bud ïa kane ka aiñ bad ngin ym lah ban ai Trading License ïa ki nongkhaïi bar jylla tang na ka liang ka KHADC khlem da ïoh ïa ka NoC na ka shnong, Raid, ne Hima.”
“Kumba long ha Majai kaba hap hapoh ka Hima Sohra, ngi pan ïa ka NoC na u Syiem bad lada ym pat ïoh ïa ka NoC ngim pat lah ban pynthymmai ïa kine kiba aplai (laisen) bad kata ka pynlong ïa ki 44 ngut ki nongkhaïi bar jylla ban leit sha Iingbishar,” u la ong.
U la ïathuh ba ha kane ka jinghiar khynra ha ka shnong Majai, ki don bun tylli ki dukan jong ki bar jylla, ym tang ki 44 ngut, ki bym biang lehse ki kot ki sla ki la khang ïa ki dukan. “Kane ka pynpaw shai ba ki dukan kiba don ha Majai kiba bun kiba khaïi ki dei ki bar jylla. Lada ngi lap bad ngi thikna ba kim dei na Meghalaya ngin ym lah ban ai ïa ka Trading License namar ba kane ka jaka ka don ha syndah bad ka ri Bangladesh,” u la ong.
“Kaba sngewsih haba kylli ngi kylli jingkylli ïa ki trai dukan, ngi lap ba ka kyrteng ki dei ki Khasi katba uba ap dukan u dei u bar jylla. Ynda la kylli ïa ki kot ki sla u sei pynban da ka syrnot ïathoh ban pynshisha ba u (bar jylla) shongkha ïa ka thei Khasi,” la ïathuh u Bah Pynïaid.
“Ha ka kyrteng jong ka lok, la pynïaid ïa ka kam khaïi da u lok (bar jylla). Watla katta ruh ki bym dei ki Khasi kiba ïoh lok Khasi lada kim pat don ïa ka Professional Tax ne ki nongtrei jong ki ban don ïa ka Labour License na ka liang jong ngi ruh ngi hap ban khang (ïa ki dukan) bad ngin ym ailad ban plie,” u la ong.
Ha ka jingwad bniah jong ka KHADC napdeng ki 44 ngut ki bar jylla kiba leit ujor sha ka Ïingbishar, 20 ngut ki dei ki Exporter kaba mut kim don ïa ki dukan hynrei ki don tang ka ophis treikam. “Kine kim ïohlad ban khaïi ba kim ïoh ïa ki kot ki sla. Kine ki 24 tylli ki dukan nga la phah tohkit khnang ba ngin tip shuh shuh katno ngut kiba plie bad katno ngut kiba khang. Ha ka jingshem jong ngi, kiba bun ki khang baroh shikatta lane ki khang tang mynta ka sngi ïa kata ngam tip hynrei na ka liang jong ngi ngin hap ban ai da ka Notis sa shisien namar ba ngim tip kino kiba dei trai,” la bynrap u Bah Pynïaid.
Haba kylli, “ïa mynta ngim lap mano ba dei ki trai dukan lane ki trai jaka bad mano ruh ba shong dukan. Ngim banse ban tah da ka Show Cause Notice bad lada ki dang kwah ban khaïi kin hap ban bud ïa ki aiñ ki kyndon.”
“Ïa kine ki 44 ngut kiba leit ujor sha Ïingbishar ka shong ha ngi kumno ban pyntreikam ïa ki Rule bad ki Act bad kiba biang hi ïa ki kot ki sla ngin sa peit. Na ka liang jong ka Council lada ngi hap ban ai, ngin ai halor ka nongrim bad lada ngi kyntait ruh ïa ka Trading License ruh ngin kyntait halor ka nongrim bad ngin ym lah ban shu leh kulmar tang ba la don ka jingbthah namar ha kaba kut dei ma ngi kiba thaw ïa ka aiñ bad ma ngi hi kiba hap ban pyntreikam ym ban pynkheiñ ïa ka aiñ,” la ong shuh shuh u Bah Pynïaid.
U la ong ruh ba ka Council kan ym shongthait ban khynra ïa kino kino ki dukan jong ki bar jylla kiba leh ïa ka khaïi ka pateng khlem da ïoh ïa ki kot ki sla kiba biang na ka District Council.
Ka KHADC ka don 60 ngut tam ki Pulit Enforcement ban peit ïa ka jingtreikam jong ka Council ha ki san tylli ki District kiba dang hap hapoh u pud u sam jong ka Council.
