Shillong, Nailar 13: U Bah Granary S. Thangkhiew ha ka sngi Baar u la kam ba ki arngut ki Pulit Khasi ki la byrngem ban siat ïap ïa u Bah Cherishtarfield Thangkhiew ar taiew shwa ba kan jia shisha kumba ki la byrngem.
Kum ban shu pynkynmaw, ha ka miet shiteng synnia ki Pulit ki la leit khynra ïa ka ingsah jong Bah Cherishtarfield Thangkhiew ha Mawlai Kynton Massar bad siat ïap ïa u.
Ïa kane, u Bah Granary u la pynpaw ha ka lyngkhuh sngi ïap kaba lai snem jong u Bah Cherish ha ka jingleit buh syntiew ha u lum jingtep ha Lawmali.
U Bah Granary u la kynthoh ruh ïa ka Sorkar Jylla kaba la kyntiew kyrdan ïa u Pulit uba la phla ba u la siat ïap ïa u Bah Cherishterfield.
“Ha ka jingshisha ka Sorkar ka ladei ban kem ïa u Pulit (uba donkti ban siat ïap ïa u Bah Cherish) hynrei ka la kyntiew kyrdan pynban. Kane ka pynpaw shai ba dei ka Sorkar kaba phah ban siat ïa u hynmen jong nga,” ong u Bah Granary.
U Bah Granary u la ong ruh ba kane ka jingleh jong ka Sorkar ka pynshlur pynban ïa ki Pulit ba kin pynïap briew. U la ïathuh ba haduh mynta kane ka khyllipmat kane ka jingjia ka dang don hapoh ka ïingbishar Meghalaya High Court bad u la pyntip ba ka jingshong bishar ba khatduh kan sa long ha ka 19 tarik mynta u bnai.
“Nga ithuh bad nga tip ruh ïa ka kyrteng jong ki ar ngut ki Pulit Khasi kiba byrngem ban pynïap ïa u Bah Che. Nga kyntu ïa ki ban wan ïakren markhmat bad ka ïing kasem ban ïathuh na kano ka daw ba ki byrngem ban pynïap ïa u Bah Che namar haduh mynta kum ka iing ka sem ka dang sah ha ka umdum,” la ong u Bah Granary.
U la kyntu ruh ïa u Pulit uba siat ïap ïa u Bah Che ba un mih shakhmat ban phla ïa ka jingshisha mano ba ai hukum ban siat ïap ïa u Bah Cherish uba long u General Secretary ba la shongthait jong ka seng HNLC.
U la kam ruh ba u da tip thikna ba ym dei ki Pulit bar jylla kiba siat ïap ïa u Bah Cherish hynrei dei hi ki Pulit Khasi.
Ha ka jingleit buh syntiew ha u lum jingtep ha Lawmali la sakhi lang da ki dkhot jong ki lai tylli ki seng bhalang ba kynthup ïa ka KSU, FKJGP bad ka HNYF, ka HYC, Ka Sur ka Bri U Hynñiewtrep, ka Seng Samla Mawlai Pyllun, u Vice Chairman ba la pyndem wait jong ka HNLC u Bah Manbhalang Jyrwa bad kiwei kiwei ki riewpaidbah.
