Shillong, Jymmang, 27: U Bah Lektor Dkhar uba dei u nongshong shnong jong ka shnong Khliehmyntriang, West Jaiñtia Hills District ha ka sngi Baar u la phah da ka jingthoh sha u Myntri Rangbah ka Jylla Conrad K. Sangma ban dawa ïa ka Sorkar ba ka dei ba buh noh ïa ka Drug Inspector Office ha East Jaiñtia Hills District khnang ban peitngor ïa ka jingjyllei ki dukan die dawai be-aiñ ne ki Pharmacy beaiñ naduh ba sdang shaduh bakut jong u pud u sam ka East Jaiñtia Hills District.
Ha ka jingïakren bad ki lad pathai khubor, u Bah Lektor Dkhar u la kynnoh ba ki don byllai ki bar jylla kiba buh ïa ki Pharmacy beaiñ ki ak ïalade kum ki doktor ha kaba ki ju ai drip bad ai injek ruh wat ïa ki nongpang haba ki leit shim dawai bad nalor kata kaba kham sngew triem shuh shuh ka long halor ka jingkynnoh ba kine ki bar jylla ki donkti wat ban pynhap khun ruh.
U Bah Lektor u la pyntip ba u la phah da ka jingthoh sha u Deputy Commissioner jong ka East Jaiñtia Hills ban khynra naphang ïa ki pharmary beaiñ ba la pynïaid da ki bar jylla.
Nalor kata, u la pyntip ruh ba u la aiti da ka jingthoh ha u Myntri ka tnat Food And Civil Supllies halor ka jingdawa ban buh noh ïa ka kudam jong ka Food Corporation of India ha East Jaiñtia Hills district khnang ba ki paidbah nongshong shnong kin ioh kham kloi ïa ki marbam mardih.
