Shillong, Jylliew, 15: Ki shipai Border Security Force (BSF) jong ka 110 Battalion ha ka sngi Thohdieng mynta ka taiew ki la ioh kurup ia ki dawai ba la song bha ha ki synduk bad ia ki mobile phone kiba shongdor 73 lak tyngka ia kiba la thmu ban shalan beain sha ka ri Bangladesh da ki snar nongkhaii na khappud jong ka East Khasi Hills District.
Hadien ba la ioh ia ka jingtip kaba bniah, ki shipai BSF ki hiar sha rud ka wah Khasimara ha kaba ki la lap ia kine ki dawai bad ki mobile phone ba la shong bha ha ki synduk. Ia kine ki mar khaii tuh la aiti noh sha ka ophis Custom ban leh ia kaba donkam katkum ki kyndon jong ka ain.
Ha kawei pat ka jingkhynra, ki shipai BSF jong ka 200 Battalion da ka jingiatreilang bad ki Pulit ka jylla Meghlaay ki la ioh kurup 10 hajar kilo ka shini ba la buhrieh ha kawei ka ingjah kaba don ha khappud jong ka shnong Rongra, South Garo Hills.
