Shillong, Nohprah, 03: U MLA ka United Democratic Party ka West Shillong Constituency u Bah Paul Lyngdoh u la kyntait mardor ïa ki khubor hamsaïa kiba mih ha ki lad pathai khubor ba u lah ban mih noh na ka United Democratic Party (UDP) bad ban leit pynïasoh sha ka National Peoples Party (NPP).
Ka UDP ka dei ka seng saiñpyrthei kaba ïatreilang hapoh ka kynhun jong ka Meghalaya Democratic Alliance (MDA) kaba bat ïa u lakam synshar hapoh ka jingïalam jong ka National Peoples Party (NPP).
Ha ka jingïakren bad ki lad pathai khubor ha ka sngi Balang u Bah Paul Lyngdoh u la ong, “ki dei tang ki jingmutdur bad kam pat ju rung ha ka jabieng jong nga ban mih noh na ka UDP. Lada ka don kano kano ka jingeh, ïa kata ka jingeh, dei ban ïakren hapoh ka party.”
Haba pynpaw ba ka don ka jingbym hun ha kaba ïadei bad ka jingbujli ïa ki Myntri Sorkar hapoh ka UDP, u Bah Paul uba long ruh u Working President ka UDP u la ong, ‘ho,oid, ki don katto katne hapoh ka party ki bym hun ïa ka jingbujli shuki Myntri da ki nongïalam ka party. Hynrei ïa kine ki mat ki dei kiba ngin sa ïakren hapoh ka party,” u la ong.
“Nga ïaiban halor kawei ka mat, ha ka jingïaid lynti jong nga ha ka jylli jong ka saiñpyrthei, nga dei borabor u nongïaleh ym u nongpyndem. Kam long kaba suk ba ngan pyndem,” u la ong shuh shuh.
