Shillong, ïaïong, 07: Ki jaidbyniew Garo kiba shong basah ha ki shnong khappud jong ka jylla Meghalaya bad Assam bad kiba dang hap ruh hapoh ka Nongstoiñ C&RD Block ki la pynpaw ba ki kwah beit ban neh hapoh u pud u sam jong ka jylla Meghalaya lada ka Sorkar Assam bad ka sorkar Meghalaya ki ïa pynbeit noh ïa u pud u sam ha ka wat kaba ar na ka bynta ki hynriew tylli ki jaka ba dang don hapdeng ka jingïakajia pud.
Ïa kane la sakhi ha ka jingïalang jong ki paibah ka shnong Umthli, kawei na ki shnong kaba la buhai da ki jaidbynriew Garo ha ka thaiñ Kyrshai bad kaba dang hap ruh ha ka Langpih Sector.
Ha kane ka jingïalang kaba la long ha ka ïingdorbar jong ka shnong Umthli la don lang ryngkat ki dkhot bad ki nongïalam jong ka Federation of Khasi Jaiñtia and Garo People, Ri Muliang Circle.
U Sordar jong ka shnong Umthli u Greenstar G Momin haba ïakren bad u nonglum khubor kaBatesi Tv u la ong ba ym tang ka shnong Umthli hynrei kiba bun ki shnong ba la shong la sah da ki Garo kiba don ha ka thaiñ ki kwah beit ban ïaineh ha ka jylla Meghalaya ha ka jingïapynbeit pud bad u la kyntu ruh ïa ka Sorkar Meghalaya ba kan pynkloi noh ïa kane ka kam kumba la leh ha kiwei ki Sector.
Katba u President ka FKJGP u Bah Serbilin Lyngdoh u la ong ba ka Seng ka dawa ïa ka Sorkar Meghalaya bad Assam ba kim dei shuh ban dang pynslem ban pynbeit ïa u pud u sam namar katba dang slem ki jingeh ruh ki nang mih bad la ïohi ruh lyngba ki dak ki shin ïa ka jingshah thombor jong ki briew khappud ka dang ïai jia na ka sngi sha ka sngi.
