Shillong, ïaïong, 27: Ki trai bad ki nongñiah trok na rilum Jaiñtia kiba don hapoh ka shatri jong ka Meghalaya Commercial Truck Owners and Driver Association (MCTO&DA) ha ka sngi Saitjaiñ ki la pynpaw ïa ka jingsngewkhia halor ka jingbym kheiñ snep jong ki trai karkhana pynmih Coke bad ki karkhana pynmih dewbilat.
Ha ka jingïakren bad ki lad pathai khubor, u Bah Smen Kyndait uba long u dkhot jong ka MCTO&DA u la ong, “ngi la ïatreilang bad ka Joint Action Committee (JAC) jong ka seng ki trai bad ki nongñiah trok ban ïakren bad ki trai jong ki karkhana Coke hynrei kim pdiang satia ïa ngi kum ka seng.”
“Ngi la buh sngi ruh ha ka 22 tarik mynta u bnai ban pynlong da ka jingïakhih hynrei da ka jingkhot ïakren jong u Deputy Commissioner, ki nongïalam jong ki lai seng ki la pynsangeh noh ïa ka jingïakhih,” la pyntip u Bah Kyndait.
U la ïathuh ba kum ka seng kan sa phah biang ïa ka shithi jingpynkynmaw sha ki trai nongpynïaid Karkhana Coke kiba don ha rilum Jaiñtia. Ngin aipor haduh ka 6 tarik, Jymmang bad lada ki trai karkhana kim sngap (ïa ka jingdawa) ngi la rai ba ngin pynlong da ka jingïakhih.”
Haba kylli, u Bah Kyndait u la ong, “ki briew kiba don ha ka bor bad ki briew ki bym don ha ka bor ki sah kumjuh. Kawei kaba ktah ïa ngi ha rilum Jaiñtia kumba ngi ïohi ki don ki karkhana Coke bad karkhan dewbilat kiba heh. Hynrei ngim don pat ka jingïatylli kat haduh ba ki trai karkhana ki ïohlad ban thied da ki kali lajong ban kit mar sha Assam. Katba ma ngi trai ri trai muluk ngi duh ïa ka kit ka bah.”
U la ïathuh ruh ba ki don ki trai kali kiba hap shu set noh ïa ki trok namarba ym ïohkam shuh da ka jingshim kabu jong ki trai pynïaid jong ki karkhana.
“Ki trai jong ki karkhana kim kheiñ snep ïa ngi, ngi long kum ki nongtong um hapoh rilum Jaiñtia. Ngi kyrpad ïa ki seng jong ki trai bad ki nongñiah trok ban ïatreilang da kawei ka jingïasngewthuh jingmut bad ban pyrkhat jngai ïa ka lawei. Ngi kyrpad ba ngin ïatreilang,”la kyntu u Bah Kyndait.
Shuh shuh u la ïathuh ba ka jingdon jong ki karkhana kiba heh ha rilum Jaiñtia ka buh jingeh ïa ki trai ri trai muluk ha ka ïohkam ïohjam. “Ngi kyntu ïa ka Sorkar ba kan shimkhia lem ïa kane ka jingeh jong ngi,” la kyntu u Bah Kyndait.
