Shillong, Jymmang, 26: Ka Khasi Students Union (KSU) Vairengte Circle, Kolasib District, Mizoram ka la pynsngew hakhmat u Myntri ka Sorkar Mizoram uba khmih ïa ka tnad Land Revenue & Settlement bad Food, Civil Supplies & Consumers Affairs u B. Lalchhazova halor ka jingsahteng ban ai ïa ki Land Settlement Certificates (LSC) ïa ki longiing Khasi kiba la sah naduh hyndai ha ka Jylla Mizoram.
Ka KSU ka la khyllie ïa kane ka mat hakmat u Myntri ka Sorkar Mizoram ha ka jingpynlong ïa ka Cultural Meet cum Academic Award ha ka 24 tarik, Jymmang 2025 ha Vairengte Community Hall, Kolasib District, Mizoram kaba don hajan ka shnong Khasi Veng, kaba dei ka shnong ba la shong la sah da ki jaidbynriew Khasi naduh hyndai hynthai ha shwa ban kha ïa ka jylla Mizoram, Meghalaya bad wat ïa ka jylla Assam. Ki Khasi watla ki la sah naduh hyndai ha Vairengte kum ha ka shnong Khasi Veng, Phaisen bad Saipum hynrei kim pat ïoh ïa ki kot patta lane kot jaka na ka Sorkar Mizoram. Baroh ki shnong ki dei kiba dang hap ha ki thaiñ nongkyndong bad ki long kiba sahdien ha ka liang ka ïoh ka kot.
U B. Lalchhazova u la kular ba shen ka tnad ba dei peit kan sa shong bad bishar halor ki jingangnud jong ki Khasi ba sah ha Mizoram.
Ki Khasi kiba long ki trai shnong ha Mizoram ki don kumba 115 longiing ha kaba kumba 80 longiing ki don ha Khasi Veng (Veng ka mut shnong ha ka ktien Mizo). Ki don kumba 500 tam ngut ki Khasi bad jan baroh kim im ja da kaba rep tympew bad kwai.
Ka KSU ka la pynkha ïa ka KSU Vairengte Unit ha u snem 2009 hadien ka jingshah thombor ki nongrep Khasi ha kiwei pat ki jaidbynriew heh paid bad lyngba ka KSU Vairengte Unit bad ka Khasi Welfare Committee Vairengte la lah ban pynbeit ïa ka jingïakynad lyngba ki jingïakren bad jingïasyllok bad ki heh paid Mizo.
Ka jingthmu jong ka KSU Vairengte Circle ban pynlong ïa ka Cultural Meet cum Academic Award ka long ban lumlang ïa baroh ki paid Khasi kiba la shong la sah naduh mynshwa ha ka jylla Mizoram bad ban ai mynsiem ïa ki khynnah pule Khasi ba kin shimkhia ïa ka pule puthi kaba long ka atiar ban kyntiew bad ïada ïa ka jaidbynriew Khasi ha jylla Mizoram.
Ha ka jingpynkup burom ïa ki samla pule u B. Lalchhanzova uba la long kum u kongsan, katba u General Secretary ka KSU Central Body u samla Donald V. Thabah bad u SDO jong ka Vairengte Civil Sub-Division u H. Vanlalbiakzuava kiba la long kum ki symbud kongsan.
Ka seng ka la pynkup burom ruh ïa ki 9 ngut ki samla pule Khasi kiba wat hapdeng ki jingïakynduh jingeh ki la lah ban pyndep ïa ki jingpule jong ki.
Ki samla pule ba la shah pynkup burom ki long ka Jessica kaba ïoh 1st Division ha ka Science, Mizoram Board of School Education (MBSE), High School Secondary Leaving Certificate (HSSLC), u Sakti Sympli, uba ïoh 2nd division ha ka Science, HSSLC, MBSE, u Augustine Pala uba ïoh 1st Division ha ka Arts, HSSLC, MBSE. U Augustine u la ïoh distinction ruh ha ki sobjek Mizo bad Education.
U Wanbor Pala uba ïoh 2nd Division ha ka Arts, HSSLC, MBSE, u Generous Pajat, uba ïoh 3rd division, HSSLC, Meghalaya Board of School Education, ka Elsa Syih kaba ïoh 1st Division ha ka CBSE (high School), ka Elsa ka ïoh distinction ruh ha ka sobjek Hindi, ka Catherine Muksor, kaba ïoh 3rd division ha ka High School Leaving Certificate (HSLC), MBSE, ka Kristina kaba ïoh 3rd Division ha ka HSLC, MBSE, u Bilansius Ïaineh Pajat uba ïoh 3rd division, HSLC, MBSE.
