Shillong, Naiwieng, 18: Ban pynkmen ïa ki khunswet kiba la ïakynduh jingeh ha ka jingim ka jong ki, ka Reach Shillong Ministry ha ka sngi Saitjaiñ ka la ïakmen lang bad kine ki khynnah da kaba pynlong ïa ka jingrakhe Children’s Day ha ka ophis treikam jong UDP.
U Myntri ka Sorkar Jylla Bah Paul Lyngdoh uba la long kum u kongsan u la sam ïa ki jingai sngewbha sha ki heprit kiba la ri bad sumar da ka Lawei ba phyrnai Children’s Home, ka Open Day Shelter, ka Open Day Shelter, Mawblei, ka RMS School for Underpriviledge bad ka Open Day Shelter, Nongmensong, 24 Hours Crisis Management Centre.
Haba kren kum u Kongsan, u Bah Paul u la ong, “don na phi kiba dei ki khunswet, don na phi kiba la mad ïa ki jingeh ha ka jingim ka jong phi, hynrei ngin kynmaw ïa kane kumba i Pastor Reuben i la ïalam katne snem ïa ka Ministry, kane kan pynkynmaw ïa ngi ba u Nongpynim jong ngi u Trai Jisu Khrist haba ki kmie ki kpa ki ïalam ïa ki khynnah sha u Jisu ba un kyrkhu ïa ki, hynrei ki Synran jong u Jisu ki la beh ïa ki, hynrei u Jisu u la ong, “shah ïa ki khynnah rit ba kin wan sha Nga, namarba ka Hima Bneng ka dei ka jong ki.”
“Pastor ïaid beit shakhmat ha kane ka jingïaid lynti jong phi. Ka jingleh jong phi ka pynkynmaw lang ïa ngi ba ka imlang ka sahlang kaba khlain ka dei ka imlang ka sahlang kaba sumar ïa kiba tlot, kaba kdup bad kaba kner sha kiba tlot. Nga kwah ba kane kan dang bteng,” u la ong.
“Ngi long kiba donbok haba nga shimti ïa ka tnat Social Welfare dang ar bnai, ka Ministry na Delhi ka la ai ïa ka mang pisa na ka bynta ki Angwandi Centre haduh 226 tylli ki centre bathymmai. U Blei U ïohi, U ïalam bad U btin lynti ïa ngi. Kaba kongsan ka long ma ngi, ngin leh pat la ka jong ka bynta,” u la bynrap.
U Pastor Reuben ha ka jingïakren bad u nongthoh khubor u la ïathuh ba ka Reach Shillong Ministry ka don ar tylli ki Children’s Home, ki jaka ri khunlung, saw tylli ki Open Shelter, kata, ha Laitkor, Mawblei, Nongmensong bad Bomfyle Road.
“Ngi don ruh ïa ki skul ba ngi la ai jinghikai ïa ki khynnah kiba wan na ki longing ki baduk. Ha ka shibnai ngi ai jingshakri haduh 400 tam ngut ki khynnah ha ki Centre,” la ong u Pastor Reuben bad bynrap, “ki lah ban dei ki khunswet, kiba la shah iehnoh, kiba sah ha ing tangba ka jingim ka jingim jong ki kam long pat kaba shngaiñ.”
Haba kylli, u la ong, “la 18 snem ngi la trei kumne bad ngi dang pyrkhat ba kan pynduna ïa kine ki khynnah ha ki Centre hynrei kam shym la long kumta, ngi la hap ban plie shi plie ïa ki Centre. Ka daw kaba ngi lap, katkum ka jingwad bniah, ngi lap ïa ka jinglong lyngkar jong ki longing longsem bad ka jingpait jingpra jong ki longing longsem bad bun na ki khynnah kiba la ri ha ki Open Shelter ki dei kiba ka kmie ka hap ban kit khunrei. Ka long ka bym ishngaiñ.
U la ïathuh ruh ba ha ki Centre kiba ka Ministry ka la pynïaid, la ai jingïasyllok, la ai jinghikai (vocational training), la pynleh ïa ki MHIS Card, ki Aadhar Card bad ka thong jong ka Ministry ka long ban pynthikna ba ki khynnah kin ïoh ïa ka jingsumar haba ki pang ki shitom. “Ka jingtrei jong ngi ka long beit ban ïada ïa ka hok jong ki khynnah.”
U la ong shuh shuh ba ha ka jylla hi baroh kawei, katkum ka jingshem jong ka Ministry, kiba bun hi ki dei ki longiing kiba ka kmie ka hap ban kit khunrei.
“Ka thong jong ka Ministry ka long ban ïada ïa ka hok jong ki khynnah, ka hok ban ïoh jinganng jingstad ka hok ban ïoh ïa ka jigkoit jingkhiah. Ha ka skul kaba ngi la pynïaid ngi hikai khap shniuh, ngi hikai thaiñ mula, hikai suh jaiñ bad kiwei kiwei namarba ki khynnah ki bym da lah bha ha ka jingpule ngi hap ban hikai da kiwei pat ki jait kam da ka jingkhmihlynti ba ha kawei ka sngi kin dup lah ban ieng ha la ki jong ki kjat ynda ki la heh la san bad kin dup lah ban kyrshan ïa la ka ing ka sem,” u la ong.
“U don uwei u khynnah uba na surok mynta u la pule ha University, u don uwei u khynnah uba na surok mynta u dei u Instructor jong ngi, uba ai jinghikai ïa kiwei pat ki khynnah. Ki la don hi ki soh kiba bha hynrei ki don ruh kiba la ïaid ha la ka jong ka mon,”la ïathuh u Pastor Reuben ïa ki soh kiba mih na ka jingtrei kaba la 18 snem kynthih jong ka Ministry ha ki bynta bapher bapher jong ka Sor bad Khapsor.
“Ngi da kwah ban pynduna namarba ki khynnah kim dei ban don ha ki jaka ri khunswet hynrei ki dei ban don bad la ki bahaing hasem pynban katba nang mih u snem ki nang bun. Ka jingduk jingkyrduh, ka jingwan tuid jong ki nongkyndong sha sor, kita ki dei kiba ngi ïohi kum ishu kiba eh bha,” u la ïathuh shuh shuh.
U la ïathuh ruh ba ka Ministry ka la sorjamin ban wad jaka na ka bynta ban buh ïa ka Centre ha Mawiong.
“Ka jingthmu jong ka Ministry ka long ban kham pynleit jingmut tang ha ki jaka sor ba ki don ki longing kiba duk ba kyrduh. Ki longiing kiba duk ha sor ki kham shitom katba sha nongkyndong dang lah ban im,” u la ong.
