Shillong, Nohprah, 10: Ka Khasi Students Union (KSU) West Jaiñtia Hills District ha ka sngi Balang ka la ong ba kan ym ailad daleilei ruh em ban pynpoi ïa ka lynti Rel sha rilum Jaiñtia katba ym pat don ki aiñ kiba pyrkhing ïa ka rung ka mih jong ki briew kiba wan nabar ka jylla.
Ka Sorkar India ha ka Budget 2024-2025 ka la mynjur ban pynlong ïa ka jingsorjamin na ka bynta ki ar tylli ki lynti rel kiba poi haduh ka sor Jowai ïa kiba tip kum ka Khliehriat & Chandranathpur Line (79 km) bad ka Chaparmukh & Jowai Line (180 km).
Dang khyndiat sngi ka la mih ruh ka jingpyrshah na ka Jaiñtia Students Union (JSU) ïa ka North East Frontier Railway (NFR) ban sorjamin ïa ka jingtyrwa ba la thmu ban pynpoi ïa ka lynti Rel haduh Jowai.
Ha ka jingïakren bad ki lad pathai khubor, u President ka seng u Bah Laitphar Syngkrem u la ong, “watla ka Rel kam pat poi hynrei ka jingdon ki mynder mynta ha rilum Jaiñtia ka la long kumba 30 percent eiei na ka jingdon ki nongshong shnong bad lada wan lei sa ka lynti Rel la tikna ba kin tyllep ïa ki trai shnong.”
“Ngi pyrshah ban pynpoi ïa ki ar tylli ki lynti Rel shaduh Jowai. Ngi ïeng skhem naduh ki snem ba mynshwa haduh mynta ngin pyrshah ban pynpoi ïa ka lynti Rel ha kino kino kino ki jaka kiba dang hap hapoh ka Bri u Hynñiewtrep. Kane ka jingpyrshah ka long ba ngi la ïohi ïa ka jingrung kyrthep jong ki bar jylla bad ki bar ri,” u la ong.
“Wat haduh mynta bym pat don ka lynti Rel katno ngi shah ban beiñ, katno ngi shah iuhroit ha ki briew kiba nabar,” la ong shuh shuh u Bah Syngkrem.
“Ngi kren da kaba shai ïa ka Sorkar balei ki kynshoit da ka lynti Rel, shaei ka ILP. Ki buhrieh bad shaei kata ka MRSSA phi buhrieh. Phi dei ban pynbiang shwa ïa kine ki aiñ kiba khanglad ïa ka jingrung kyrthep hynrei lym kumta wat khmih lynti ba ka KSU kan ailad ban leh katba phi mon ban pynpoi ïa ka lynti rel sha sor Jowai,” la pynpaw u President ka KSU WJH.
U la maham ruh lada ka Sorkar ka leh da ka bor ka KSU kam banse ban mih shakhmat ban pyni da ka bor.
Haba kylli, u Bah Syngkrem ula ong, ‘ngi tip shai ba ki paidbah hapoh ka Bri u Hynñiewtrep kin ym pdiang daleilei ruh em ïa ka lynti Rel bad haduh kane ka khyllipmat ka sur jong u paidbah kim pdiang ïa ka lynti Rel.”
U la kam ruh ba ki don ki khwai myntoi ne ki Dalal kiba kwah ban pyndap ïa ka pla lajong ki kloi ban pynngop ïa ki paidbah.
“Ka jingdon jong ki mynder (ha rilum Jaiñtia) ka dang kiew bad kiba bun hi ki dei ki mynder Bangladeshi. Katkum ka jinglong jingman ki bar ri bad ki bar jylla ki don haduh 30-40 percent. Lada ngim leh eiei, ngi ki trai ri ngin sa kylla long ki ritpaid,” la ong shuh shuh u Bah Syngkrem.
