Shillong, Naitung, 12: Ki dkhot jong ka Khasi Students Union (KSU) Nongmensong Unit ha ka step sngi Saitjaiñ ki la bat ïa kawei ka trok kit phan kaba don ïa u registration number AS28 AC 0179 ba la thep ïa ki syiar ba la suba ba ki dei kiba shu kit tuh ba la wanrah na ka jylla Assam sha kane ka jylla Meghlaya.
Ïa kane ka trok kaba pynieng harud surok ha iew Nongmensong la lap nyngkong eh da u Organising Secretary ka KSU Nongmensong Unit u samla Samuel Kharbani katba u dang ïaid kai step ha kane ka sngi ha ka por kumba 4:30 baje haduh 5:00 baje mynstep.
Katkum ka jingïathuh jong u nongñiah trok, ka Challan kaba la ïoh ka long tang ban kit ïa u phan ym ïa ki syiar.
‘Mynta ka step katba nga dang ïaid nangne nga la i shankhmat ïa kane ka kali kaba ieng hangne. Ynda nga la leit kylli ïa u nongñiah, ka jubab ka long ka bym shai bad ynda nga la peit shapoh jong ka trok nga lap pynban da ki syiar,” la ïathuh u samla Samuel Kharbani lyngba ka video ba la phah sha ki lad pathai khubor.
“Kumno ha ka dur jong u jhur yn thep da ki syiar,” la buh jingkylli une u nongïalam ka KSU Nongmensong Unit bad pyntip ruh ba kane ka trok ka la mih na Ribhoi District khlem da don kano kano ka jingtalasi ïa ka kali hapoh ka Checkgate.
“Hato kine ki syiar ki long neem kiba shngaiñ ïa ki briew ban bam? Hato lah test neem ïa kine ki syiar? Kine ki syiar ki wan ha ka dur kaba ngim lah shuh ban sngewthuh,”la buh jingkylli une u nongïalam ka KSU.
“Kane ka pyni ba ka tnat ka la phiel ban talasi ïa kane ka kali ha Ribhoi. Lada mynta ka sngi ha ka dur jong u phan ki don ki syiar mano ban tip lada talasi hapoh ka kali un don sa u drok? Mano ban tip lashai la shisngi ba dang khyndiat sngi ngi dang ïohi ba ka Sorkar Assam ka la kyndang naphang ïa ki briew kiba sah be-aiñ ha ka jaka Sorkar. Mano ban tip lashai la shisngi, ha ka dur jong u jhur yn thep da ki briew,” la kynthoh u samla Kharbani.
Haba buh jingkylli ïa ka jingtlot ka tnat Veterinary bad ka tnat Pulit ka Sorkar Jylla, u samla Kharbani u la ong, “ka jingkylli mynta ïa ka tnat Pulit bad ïa ka tnat Veterinary ka long kumno ki syiar ki ïoh ban rung shapoh ka jylla. Hato ïa kine ki syiar la leh test neem katkum ka rukom ba dei ban leh ba kin long kiba bit ba ki briew kin bam.”
“Tangba phi ïaid na ka surok Nongmensong kaba dei ka Constituency jong u Myntri uba khmih ïa ka tnat Animal Husbandry and Veterinary kam mut ba phin shu ïaid katba mon,” u la ong.
U la ong haba la kylli ïa u nongniah jong ka trok shaphang ki syiar u ong, “ngam tip, nga ïoh pisa tang ban kit.” “Kane ka pyni ïa ka jingbym don jingkitkhlieh jong ki mynder kaba kim salia eiei ruh em lada wanrah da ka bih ba ngin bam hangne, ban wanrah da ki bar jylla ban rung hangne, ki mynder kiba nabar kim pushe bad kim salia eiei ruh em,” la kynthoh shuh shuh u samla Kharbani.
