Shillong, Ïaïong, 25: Ki Superintendent of Police cum Foreigners Regional Registration Officer jongki District ka jylla ha ka sngi Thohdieng ki la kyrpad ïa ki paidbah ban pyntip sha ka Police Control Room ha u nombar 112/+91 6009196479 ne pyntip sha ki thanat ba marjan lada ki don kino kino ki jingtip halor ka jingdon jong ki nong Pakistan hapoh ka jylla Meghalaya.
Ha u kyrwoh, la pyntip ba la pynmih ïa kane ka jingkyrpad ka dei lyngba ka jingbthah jong ka Ministry of Home Affairs, ka Sorkar India kaba la pynmih ha ka 25 tarik mynta u bnai kaba hukum baroh ki nong Pakistan lait noh kito kiba la don ïa ka Long Term Visa bad Diplomatic ne ka Official Visa hynrei kiwei pat la bthah ba ki dei ban mih noh mardor napoh u pud u sam jong ka ri India ha lane shwa ka 27 tarik mynta u bnai.
La bthah ruh ba ïa ki nong Pakistan kiba wan lyngba ka Medical Visa la bthah ba ki dei ban mih noh napoh ka ri India ha lane shwa ka 29 tarik mynta u bnai bad kito kiba don hapoh ka SAARC Visa la bthah ba ki dei ban mihnoh ha lane shwa ka 26 tarik mynta u bnai.
Lada ka don ka jingbym bud ïa kine ki jingbthah ba la kdew haneng kin shah pynshitom katkum ka aiñ ba kynthup ïa ka jingpyngngat hapoh ka Criminal Case.
Ïa kane kajuh ka jingpynbna la pynmih da u Superintendents of Police (SP) – cum – Foreigners Regional Registration Officer ka East Khasi Hills, Ribhoi District bad East Jaiñtia Hills District.
