Shillong, Naiwieng, 12: Ka Khasi Jaiñtia Deficit School Teachers’ Association (KJDSTA) bad ka Garo Hills Deficit School Teachers and Employees Association (GHDSTEA) ki la kyrpad ïa ka Sorkar Jylla ban ïada ïa ka jingmyntoi jong ki nonghikai skul Deficit haba pyntreikam ïa kano kano ka rukom siew tulop kaba thymmai ne ka jingpynïapher kyrdan.
Haba aiti ïa ka jingthoh ba la ïasoi lang sha u Myntri ka tnat Pule Puthi ka Sorkar Jylla u Bah Lahkmen Rymbui ha ka sngi Balang, ki ar tylli ki kynhun ki la ong ba ki nonghikai ki sngew sheptieng halor ka jingthmu ban wanrah tang ar tylli ki kynhun jong ki nonghikai kumba la pynbna ha u bnai Lber, 2025.
“Sngewbha ban pynthikna ba ka jingthmu ban pynbynta kyrdan ïa ki nonghikai kan ym ktah ha kano kano ka rukom ïa ki nonghikai skul Deficit. Ngi kyrpad ïa ka Sorkar ba kan buh ha ka jingmut ïa ka jinglong jong ki kam ba la ai jingbit jong ki nonghikai deficit haba pyntreikam ïa kano kano ka rukom siew ba thymmai ne ka polisi pynïabynta kyrdan, da kaba pynthikna ba ki jingmyntoi jong ki nonghikai skul deficit kin long kiba la pyntreikam pura,” ki la ong.
U President ka KJDSTA u Babu Boswell Pala ha ka jingïakren bad ki lad pathai khubor u la pynpaw ïa ki katto katne ki mat kiba kyrkieh, ki bym pat lah ban pynbeit kiba ktah ïa ki nonghikai skul deficit. U la ong ruh ba nongtrei sorkar ki la ïoh ïa ka DA kaba 49% (dang shen la pynkiew sha ka 51%), katba ki nonghikai skul defict ki dang ïai bteng ban ïoh ïa ka DA kaba 43%, ha kaba ki Arrear ki dang sahkut.
“Kumta, ngi kyntu ïa ka Sorkar ban pynthikna ïa ka jingsiew ïa ka DA (kumba la ju leh) bad ki nongtrei Sorkar ha ka por kaba biang, ban kyntiew ïa ka jingsngewthuh ïa ka jingleh hok, bad ban khanglad ïa ka jingsngewthuh ïa ka jingbymlah jong ka rukom treikam na kaba sdang, ban pynneh ïa ka kyrdan hapdeng ki nonghikai skul deficit katba ki dang ïai don ha ka kam ban noh synniang bad bad shakri ïa ka imlang ka sahlang lyngba ka kam hikai skul,” u la ong.
Ki nonghikai kiba la rung sha ka kam shwa ka 1 tarik, Ïaiong, 2010 kim pat ïoh ïa ka Centralised Provident Fund (CPF). “Ngi kyrpad ïa u Myntri ban leh eiei noh mardor ban pynkloi ïa kane ka skhim,” u la ong bad bynrap, ‘ki don ruh ki nonghikai skul kiba la shongthait wat haba ki pang ne ynda ki la khlad kim ïoh satia ïa ka song jingïarap na ka Death-cum-Retirement Gratuity.”
Ha kaba ïadei bad ka onlie budget submissipn (MEGH-SIMS Portal), u la ong ba ka don bun bha ki jingduna ha ka Portal bad kane ka la ktah ïa ka jingsiew tulop sha ki nonghikai.
“Kumta ngi la kyntu ïa u Myntri ban pynsangeh shwa shipor ïa ka MEGH-SIMS, Portal tad haduh ban da pynbeit ïa ka rukom treikam.
U Babu Pala u la pynkynmaw ruh ïa ki jingthoh bad ki jingïalang naduh ka 5 tarik Lber, 2025, kynthup ïa ki dorkhas ba la aiti sha u Director ka School Education and Literary (DSEL) bad ha u Chief Secretary, ryngkat bad ki jingkular ba la ai hynrei ym shym la don ki jingshimkhia kiba thikna.
Ki ar kynhun ki la kyntu ïa u Myntri ka tnat Pule Puthi ban shim ïa kine ki mat kum ki mat ba kongsan tam, da kaba pynksan ïa ka jingshah ktah jong ki nonghikai, ka jingeh ha ka liang ka pisa, bad khamtam eh ïa ka jinglong jingman jong ka pule puthi ha Meghalaya.
