Shillong, Jymmang, 29: U Myntri Rangbah ka Jylla u Conrad K Sangma ha ka sngi Palei ula ong ba ka jingwad ïa ki shijur ki nongjngohkai pyrthei na Indore, Madhya Pradesh kiba la jah rngai ha ka jingleit shang suwari sha Sohra ka dang ïai bteng haduh mynta.
“Ngi kyrmen ba ngin sa ïoh ïa ka khubor kaba bha bad ngin sa lah ban lap ïa ki shijur bad ngi dang trei shitom ban leh ïa kata bad da lade hi nga la peitngor ïa kane ka jingjia bad ngi la pyrshang katba lah ban lap ïa ki shijur, kiba dang jahrngai naduh 3-4 sngi mynshwa,” ong u Sangma ha u kyrwoh.
U Sangma u la ong ba ka long ka jingjia kaba sngewsih bad ïathuh ruh ba u la ïakren bad u Myntri Rangbah ka Madhya Pradesh bad ïoh pdiang ruh ïa ka phone call na ka ophis treikam jong u Myntri ka tnat Kam Pohïing ka Sorkar India.
U Myntri Rangbah u la ong ba ki bor synshar District, ka tnat Pulit ki dang trei ïa ka kam baroh 24 kynta ban wad ïa ki shijur bad bynrap ruh ba wat ïa ki paidbah nongshong shnong ruh ki la ïarap lang ban wad ïa ki shijur.
“Ngi la pyndonkam lut baroh ki teknoloji katba ngi don ki ban ïarap ïa ngi ha kane ka kam,” u la ong.
U la ong ruh ba ha ka jingshisha ka dang dei ka aiom slap bad ka thaiñ Sohra baroh kawei ka dei kaba la ju bna nam kum ka jaka ba jur slap tam. “Namar kata, ka long ka kam kaba jwat hynrei watla katta ngi la trei shitom ban pynthikna ba ngin lap ïa ki shijur sha kano kano ka jaka ba ki don.”
Haba ïathuh na ka jinglap ha ka jingtohkit, u Sangma u la ong, “Ka jingjia ka long kumne, ki la leit sha ki jaka bapher bapher bad ïa ka thuk thuk ba ki shim wa la lap ha surokbah bad ka paw hadien ba ki la iehnoh ïa ka thuk thuk ban pynïeng ïa ka hangta ki la leit ïaid da ka kjat ban shang kai bad ka jaka kaba ki ïaid baroh arliang ki don ki lynti ïaid kjat bad ki long kiba jrong jrong. Namarba ka dei ka aiom slap, ka jingbtuit ruh kan jur bha,” bad bynrap, “ ka jingwad baroh kawei ka jaka ka dang ïai bteng, ki pulit, ki bor synshar district bad khamtam eh ki nongshong shnong ki la trei shitom bad ngi kyrmen ba ngin sa lah ban lap dien ïa ki.”
“…na ka bynta jong ngi, ki nongjngohkai pyrthei ki long kum ki bahaing hasem jong ngi khamtam ha ka thaiñ Sohra, la ju burom ïa ki nongjngohkai pyrthei kumba ki long ki bahaiing hasem. Ki paidbah nongshong shnong mynta ki don bynta lang ha kane ka kam bad manla kawei pa kawei ka shnong ka la tyrwa ban ïarap khlem shongthait bad ki bor synshar,” la bynrap u Sangma.
Ha ka sngi Balang, lai kynhun ki nongïarap ba la ai jingkyrshan lang da ka K9 Unit, ki drone na ka NESAC bad ki Pulit ka Special Operations Team (SOT) ki la hiar sha Nongriat-Pyndemdkhar-Mawlakhiat, Mawsahew-Wahkaliar Weisawdong ban wad ïa ki shijur kiba dang jah.
Ha ka 22 tarik mynta u bnai, ki shijur kata u Raja Raghuvanshi bad ka Sonam (ka kurim jong u) ki la poi ha ka shnong Mawlakhiat, Elaka Mynteng ban shim wai ka scooty na ka bynta ban leit jngoh ïa ka jingkieng jri ha Nongriat. Ki la ïalam lang ïa ki nongïalam lynti trai shnong u Bha Wansai bad sah miet ha Shipara Homestay ha Nongriat, ong ki bor sorkar.
Ki la mih ha ka 6:00 baje ha ka 23 tarik, Jymmang, 2025, da ka jingthmu ban leit phai sha Mawlakhiat. Ym shym la lah ban pynthikna la ki shijur ki ïaid neem da ka kjat na Nongriat sha Mawlakhiat lane kin leit shim pat ïa ka scooty na Mawlakhiat Parking Lot, wat hapdeng ka jingbun jong ki nongjngohkai pyrthei. Ha ka 24 tarik, Jymmang, ha ka por 9:00 baje mynmiet u Sordar ka Sohrarim u la pyntip ba ïa ka Scooty ba la iehnoh la lap na ki ar tylli ki e-Challan ha ka 25 Jymmang, 2025 ha ka por 2:30 baje noh sngi. Ïa ka ejahar ba la ujor da ki bahaiing hasem ladep ban register, la pyntip u ADC ka Sohra.
Ha ka 22 tarik Jymmang, ki shijur ki la iehnoh ïa ki pla ha Manha Homestay, Saitsohpen, Sohra, na ka daw bym don jaka bad ka jingther jong u lapbah bad ai ruh ïa ki kyrteng jong ki bad ïa u mobile phone number shwa ban leit wad jaka sah. Hynrei la lap hadien ba ki la leit sha Nongriat.
Ïa ka pla la plie da ka jingsakhi lang jong ki bahaiing hasem hynrei ym shym la ksai eiei ïa ka leit ka wan jong ki, la ïathuh u ADC.
Shuh shuh, la ïathuh ba ym shym la lah ban pynthikna ïa ka leit ka wan jong ki shijur na Nongriat sha Mawlakhiat lane ba kin pyndonkam ïa ka scooty na Parking Lot.
